Messi-a'n goal a la khung lo!

Khawvel player ṭha ber ang hiala mi tam takin an chhal Lionel Messi-a'n tun season-ah penalty chhiar tel lohin goal a la khung lo. Kum 33 mi Messi hi khelmualah hmuhnawm ṭhin mah se goal hmaah a vanneih tawk loh avangin a club khelhna Barcelona-in match rukah point riat chiah an hmu a, table-ah 12-naah an awm mek.

Barcelona hian zanin dar 8:45 hian Real Betis an mikhual dawn a, inkhelh bana zawhna tur chu Messi-a'n goal a khung em tih a ni ang. Messi hian La Liga-ah goal khat leh Champions League-ah goal thum a khung tawh a, amaherawhchu penalty aṭang vekin a khung.

Champion lai Real Madrid-in Pathianni zan dar 1:30-ah Valencia an tlawh dawn a, Los Blancos pawhin season bul ṭan ṭha lo mah se Eden Hazard-a awm hnuah hma an sawn. Chelsea aṭanga Spanish club lian zawmtu Hazard hi inhliam vangin a khel tam lo a, season khat chuang a awm tawh nachungin Real Madrid tan goal hnih chiah a la khung!