Paulo Machado-a'n Mumbai a chhuahsan

Portuguese midfielder Paulo Machado chuan Manchester City nena inzawm thar Indian Super League (ISL) club Mumbai City a chhuahsan a,  Portuguese second division club Leixoes a zawm.

Kum 34 mi midfielder hian an ram club ṭha FC Porto-ah a career ṭanin club langsar tak tak St. Etienne, Toulouse, Olympiakos leh Dinamo Zagreb tan a lo khel tawh a, 2018-19 season ṭan dawn khan Mumbai club hi a zawm. 

Mumbai City tan season hnih a khel a, mahse, season liam taah khan October-ah hliam neiin hemi hnuah hian a inlan leh tawh lo - season hnih chhungin match 29-a khelhsak a, goal thum khungin vawi nga assist a nei thei. 

Porto youth system chhuak Paulo Machado hian Euro Under 17 Championship 2003-ah khan Portugal tan champion nomawi a lo chawi tawh a, Portugal senior team tan vawi ruk a inlan hman. Club football-ah pawh a hlawhtling hle. Olympiakos tan Superleague Greece (2) leh Greek Football Cup (1)-ah nomawi a chawi a, Dinamo Zagreb tan Croatian First Football League (1) leh Croatian Football Cup (1)-ah a champion a, Aves tan 2017-18 season khan Taca de Portugal nomawi a chawi a, season tharah chhuakin Mumbai hi a zawm a, tunah an ram lamah a kir leh ta.