Celtic chak zawh loh laiin Rangers chak

Pathianni zan Scottish Premiership inkhelah Celtic-in hnehna an chang zo lo a, khualmualah Kilmarnock chu 1-1 in an inhnehtawkpui - season an ṭan chauh a, Scottish football a ngaihnawm nghal. 

Celtic hian minute 11-naah Ryan Christie hmangin goal hmahruai an khung a, kum 25 mi midfielder hian yard 35 vela hla aṭangin freekick hmangin a khung. Mahse, Kilmarnock-in holam taka tlawm an tum bik lo. Minute 24-naah Chris Burke-a penalty hmangin an si phurh an rawn sut a, an phu ang ngeia point hlawhchhuah nan an hmang. 1-1 in inkhel a tawp a, team pahnihin point an insem. 

Europa League round of 16 an paltlang zawh loh hnuah Rangers erawh an tlawm duh lo. Steven Gerrard enkawl team hian St Mirren chu 3-0 in an sawp a, Alfredo Morelos chuan goal hnih a khung. 

St Mirren defender Conor McCarthy chuan minute 23-naah an lamah a ti lut a, hei pawh hi Morelos-a cross aṭanga lut a ni - Colombian striker hian second half-ah goal hnih a khung zui a, a team a chakpui. 

Rangers hian Europa League last 16 second leg-ah Bayer Leverkusen chu 1-0 in an ngam lo a, inkhelh zawhah Gerrard chuan French club Lille nena sawizawm hlawh mek Morelos chuan a rilru a pek tawk loh thu a sawi. Mahse, season hmasaa Rangers tana goal 29 khungtu Morelos-a'n Leverkusen hnua an match hmasa berah goal hnihin coach a chhang a, chhanna duhawm a nih avangin Gerrard 

a lawm. Gerrard chuan, "Alfredo hian khelh ṭhat a mamawh tih a inhria a, ṭha takin a rawn khel chhuak a ni. Inkhel ṭantir aṭanga a tawp thleng kha en ula, a khel ṭha takzet," tiin a striker chhuanvawr chungchang a sawi.