Pep Guardiola-a'n England a pan dawn A club zawm tur a la chiang lo

Spanish coach Pep Guardiola chuan Bayern Munich-a a contract pawhsei loh chhan chu England lama kal a tum vang a nih thu a sawi.

Kum 44-a upa Guar-diola chuan, "Khawpui thara tawnhriat thar neih kan duh a, England-a hnathawh hi ka châk a ni. England aṭangin sawmna duhawm tak tak ka dawng a, eng club-ah mah contract ka la ziak lo," tiin England lam a pan tur thu a sawi a, a zawm tur club chungchangah thutlukna a siam loh thu a sawi bawk.

Barcelona coach hlui Guardiola chuan, "England-ah thawh theihna hun ṭha ka nei a, ka kum lam enin ka puitling tawk tawh a, tun hi ka tan chuan club thlakna hun ṭha a ni," a ti.

Bayern Munich-in Guardiola thlak tur hian Real Madrid leh Chelsea manager hlui Carlo Ancelotti contract an ziah pui a, Spanish manager chuan amah thlaktu tur chungchangah club-in thutlukna duhthusam an siam thu a sawi tel bawk.

Guardiola-a'n club enkawl tur a la tichiang loa a sawi laiin Bayern chief executive Karl-Heinz Rummenigge chuan season thara Spanish manager club zawm tur a hriat tawh thu a lo sawi tawh. Rummenigge thusawi hun laia Guardiola nena an sawi zawm nasat ber chu Manchester City a ni a, amaherawhchu contract ber a la ziah loh avangin Manchester United leh Chelsea bakah Arsenal hming sawi rik tel a ni.

Awh rawn Guardiola

Guardiola hi kum 44 chauha upa ni a, chutichung chuan khawvel manager hlawhtling ber zinga mi a ni.

Pep hian Barcelona kum li a enkawl chhungin nomawi 14 an chawi a, chung zingah chuan La Liga title pathum leh Champions League pahnih a tel.

Guaridola-a'n kum khat a chawl a, Bayern Munich treble champion pui thei coach Jupp Heynckes chu kum 2013 khan a thlak a. Season hnih chhungin Bundesliga-ah chiang takin a champion nghal a, tun season khelh mekah point riatin an sang fal tawh bawk. Amaherawhchu Bayern hian Spanish manager hnuaiah Champions League-ah semifinal vawi hnih an thleng a, final an lut zo lo ve ve.

Bayern-ah Pep-a'n hmabak pakhat chiah a nei tawh a, chu chu Champions Legue nomawi chawi a ni. Last 16-ah Juventus an hmachhawn dawn tih an hriat khan Guardiola chuan, "Bayern-a ka hna zo turin Champions League chiah a ngai tawh," tiin a sawi. Amaherawhchu Pep hian contract a pawhsei tawh loh miau avangin Bayern-in Champions League an chawi lo a nih chuan lungawi zan chuan club thar a zawm lo ang.

City-in an beisei

Manchester City manager Manuel Pellegrini chuan, "Ka hma lam hun hi nomawiah a innghat tawh lo. Manager ka nihna angin ka tan chuan nomawi chawi erawh a pawimawh hle. Club thuneitu chuan manager chu nomawi an chawi pawhin an ban theihna turin thuneihna a nei," tiin a hmalam hun a chian loh thu a sawi.

City manager Pellegrini a
ṭawng chhuak a, chumi awmzia chu City-in tun hma aṭanga an lo awh tawh Guardiola la lut turin Spanish manager pawm puina chiah an nghak ni berin a lang.

English club hian Barcelona hlawhltin puitu Ferran Soriano leh Txiki Begiristain te club enkawltu lamah an la lut tawh a, chuvangin Guardiola tan City zawm hi a châkawm dawn. Hemi belhchhah tur hian City hian Guardiola hi hlawh tam tak an pe thei dawn a, a player duhzawng leina tur sum an pe thei bawk ang.

United-in an awt

Sir Alex Ferguson-a'n kum 2013-a Manchester United a chhuahsan dawn khan Pep Guardiola hi amah thlak turin a duh thu tun hnaiah a sawi chhuak. Scottish manager David Moyes kha 'The Chosen One' tiin chhal mah se Guardiola hi an duh ber zawk niin a lang.

United supporter-te'n result ṭha an neih loh avangin tuna manager ṭang lai Louis van Gaal hi ban turin an duh tawh a, amaherawhchu Swansea an hneh chhoh leh tak avangin supporter duh dan hi chu a thleng lawk lo ang. Chutihrualin manager ṭha Jose Mou-rinho-a'n club enkawl a nei lo a, United nena sawi zawm tho a ni.

Sum ngah Chelsea

Chelsea-in 'The Special One' Jose Mourinho an ban a, manager lailawk atan Guus Hiddink an la lut. Season zawh rualin Dutch manager contract hi a zo dawn a, hemi hunah hian Guardiola contract a zo ve bawk ang.

Blues neitu Roman Abra-movich chuan Pep Guardiola lakluh theihna tur a nih phawt chuan a hlawh tur inchhiar zat ang pek a ngam. Amaherawhchu Abramovich-a hnuaiah manager tam takin ban an tawk tawh a, Spanish manager tan Chelsea zawm tur chuan ngaihtuah nawn a ṭul ang.

Arsenal hming a ri

Arsenal supporter ten 'In Arsene we trust' ti ṭhin mah se Premier League nomawi an chawi hnuhnun ber chu 2003-2004 season daih tawh a nih avangin an lungawi zan tawh lo.

City boss Pellegrini-a'n nomawi chawi pawh ni se a dinhmun a him loh thu a sawi a, Arsene Wenger erawh nomawi a chawi phawt chuan a dinhmun a him chiang. Hei bakah hian Gunners aiin City, United leh Chelsea te hi an chuh chak vek avangin Wenger-a hi chu club pali manager zinga dinhmun him berah a ngaih theih.

Transfer hun laiin player ṭha bik leh club lian an sawi zawm a, tunah erawh coach ṭha bikin club enkawl a nei lo a, hei vang hian Guardiola berin a tihchian hma chuan a luhna tur an inrinsiak luih luih zel ang.