Real enkawl theih vanga inchhuang Benitez

Real Madrid manager ban tak Rafael Benitez chuan Real a enkawl thei chu a inchhuan thu sawiin, a tan chuan chawimawina ropui tak a nih thu a sawi.

Kum 55-a upa Benitez hi Thawhṭanni khan Real Madrid club Board an inhmuhkhawm hnuah ban a ni a, a aiawh tur hian Real B team manager Zinedine Zidane ruat a ni.

Benitez hian Real a enkawl chhungin match 25 a khelhpui hman a, league table-ah 13-na dinhmun luahpui mekin Champions League last 16 a hruai thleng bawk.

Madrid khaw chhuak leh player a nih laia Real B team tana lo khel tawh Benitez chuan, "Ka seilenna, player nichunga ka khelhna, ka coaching career B team aṭanga ka ṭanna Real Madrid ka enkawl thei hi ka inchhuang tak zet a ni tih hi Real Madrid-a board of directors, executives, hnathawktu leh fan-te zawng zawngin min hriatsak se ka duh a ni," a ti.

Benitez chuan sawi chhun-zawmin, "He hmun ka rawn kal tirh aṭanga a tawp thlenga min thlawp tlattute hnenah lawmthu ka sawi duh a, min thlaktu Zinedine Zidane leh a staff-te hnenah result ṭha tak an neih theih nan ka duhsakna sang ber ka hlan a ni," tiin amah bantu club chu a mangṭha.