League Cup Liverpool-in Stoke hnehin final an hnaih zel

Thawhlehni zan khan Li-verpool chuan Capital One Cup semi-final inkhel thawhkhatnaah Stoke City chu 1-0 in an hneh a, League Cup final lut turin an dinhmun a ṭha ta hle.

Liverpool goal awmchhun hi Jordon Ibe-a'n minute 37-naa a khung a ni a, he goal luh theih nana Adam Lallana leh Joe Allen-te ball inpe kual vel a hmuhnawm hle.

Reds-in chak result hlawh chhuak mah se an lawm a kim lo. Malpui hliam vangin Brazilian midfielder Philippe Coutinho leh defender Dejan Lovren-te chu first half-ah zawn chhuah an ni.

Stoke City-in Chelsea, Man-chester City leh Manches-ter United an hneh ṭuma an khelh dan an phak lo a, Reds tlarhnung erawh rumṭhaih lo tawp an ni bik lo. Liverpool keeper Simon Mignolet-a'n Reds defender hlui Glen Johnson leh Joselu-te pet goal tur ṭha tak takin a dan sak a, substitute Jon Walters chuan goal khung theihna hun ṭha a neih chu a bawh pelh bawk.

Hriatthiam har Liverpool

Reds-in Brendan Rodgers an ban hnuah Jurgen Klopp an la lut a, German manager hian Liverpool a enkawl hnuah game mawi tak a khelhpui hnuah holam takin a chakpui lo leh ṭhin a, Liverpool dinhmun tak hi sawi thiam a har hle.

Stoke City lakah Reds an khel ṭha takzet a, an game a rangin an khingpuite tan hmun awl an siam lo. A sawi dan awlsam berah chuan Reds hian Chelsea (3-1), Manchester City (4-1) leh Southampton (6-1) te an hneh ṭuma an khelh dan ang khan an khel.

Mahse, he Liverpool squad tho hi Newcastle United, Watford leh West Ham laka mualpho kha an ni a, League Cup final lut chiang sa anga sawi theih an ni bik lo. Stoke laka an khelh dana an khelh chhunzawm erawh chuan Jurgen Klopp-a'n England leilunga a season hmasa berah Wembley-ah nomawi a chawi a nih pawn a mak lo ang.

Beisei phak lo Stoke City

Tun season-a beisei phak baka che ṭha chu Stoke City an ni a, Britannia Stadium-a inkhelah pawh hian Liverpool nen inkhel tawk hle tura ngaih an ni.

Mahse, kum 1972-a Chel-sea laka League Cup nomawi an chawi hnua an club chanchina thil ropui tih tum Stoke player-ten beisei an phak lo a, minute 90 chhung Liverpool thuhnuaiah an awm.

Stoke player langsar Bo-jan, Xherdan Shaqiri leh Marko Arnautovic-te Reds tlarhma lakah an thamral a, an khelmuala tih theih nei lo Potters hi Anfield-ah January 26 hian an zin ve thung dawn a, final lut tur chuan an insiamṭhat a ngai ang.

Reds buaina

Tun season-a Jurgen Klopp lu tihaitu pakhat chu Liverpool damdawi-in lun lutuk hi a ni. Krismas tuka Leicester City an hneh ṭumin striker Divock Origi chu malpui hliam vangin a buai a, Klopp-a'n kum 2015 chhunga a thumal ngainat loh ber chu 'malpui' a nih thu a sawi.

Mahse, kum 2016-ah pawh Klopp-a tan 'malpui' tih hi thumal ngainatawm a la ni chuang lo. Stoke an hneh ṭum hian a player pawimawh pahnih Coutinho leh Lovren-te chu malpui hliam vanga lakchhuah an ni a, Kolo Toure chu inkhel tluan mah se inkhel zawh lamah malpui na vang bawkin a buai.

Klopp-a "gegenpressing" style hi rang taka ball inpek kual leh player tlan tam ngai a nih avangin tharum a ngai hnem a, player fitness-in a phak loh chang a awm niin a lang.

Joe Gomez leh Danny Ings chu khup hliam vangin rei tak chhung an chawlh a la ngai dawn a, Jordan Rossiter chu malpui hliam vangin a chawl mek bawk.

English striker Daniel Stur-ridge talent neih ṭhat zia leh inhliam ngun thu hi 'chanchinthar' a ni tawh lo. Ngaia neih mai chi a ni. Klopp-a'n a player-te dam kim vek hun a nghakhlel ang a, chu hun erawh chu a la hla hle thung.

Eng nge an sawi?

Stoke City manager Mark Hughes chuan, "Mi ṭhenkhat chuan first half-a kan khelh dan avang khan min sawisel an duh mai thei a, mahse a chang chuan kan khingpuite fak mai hi kan tih theih awmchhun a ni ṭhin. Liverpool khan hmun awl min siamsak lo a, an taima em em a, kawng tinrengah inkhel kha an thunun a ni," tiin chak loh chhuanlam a zawng lo.

Liverpool boss Jurgen Klopp chuan, "Kan khelh dana kan sawisel theih awmchhun chu kan finishing kha a ni. Kan inrem dik a, football hmuhnawm tak kan khel a, mahse goal erawh kan khung tam tawk lo. Kan tana pawi ber erawh player pahnih inhliam vanga lakchhuah an ngai kha a ni a, nakin lawkah chuan pathum pawh an ni mai thei," tiin player inhliam a ngah chuan a rilru a tihbuai thu a sawi.