Ben Foster a lo kir hnai

West Brom goalkeeper Ben Foster chu hun rei tak chhung khup na vanga a inkhelh theih loh hnuah khelmual chhungah a lo kir leh thei tawh a, Thawhlehni zan khan Baggies under-21 team tan minute 45 chhung a inlan thei tawh a ni.

Kum 32-a upa Foster hi nikum March thlaa Stoke City nen an inkhelh ṭumin hliam a tuar a ni. A tira a hliam bik hi chu December thla khan dam tura beisei ni mah se October khan a intih nat belh avangin a chawlh rei phah ta a ni.

West Brom hian Inrinni zan hian FA Cup third round-ah Bristol City an hmachhawn dawn a, harsatna dang a thleng a nih loh chuan an keeper hi an chhawr thei tawh ang.

West Brom manager manager Tony Pulis chuan, "Kan hnenah Ben a lo kir thei hi kan tan chuan thu lawmawm tak a ni. Minute 45 chhung harsatna nei loin a inkhel thei tawh a, a chungchang hi medical staff te nen kan la sawiho leh bawk ang. Inrinni hian khel thei tawh mah se a tan chawlh a la ṭha zawk in a rinawm," tiin a sawi.

Manchester United tan pawha lo khel tawh Foster hian England tan pawh match riat a khel ve tawh a, Foster hliam chhung hian Manchester City keeper Joe Hart thachhang dawl turin Burnley keeper Tom Heaton leh Stoke keeper Jack Butland te koh ṭhin an ni.