Lammualah Germany-in Mizoram an hneh

2014 FIFA World Cup champion jersey nena inlan German Students National Team chuan Mizoram XI chu nimin khan Lammual khata mipui pungkhawm hmaah 3-1 in an hneh.

German team-in minute 9-na lekah Steffen Wohlfarth penalty hmangin hma an hruai a, minute 25-naah Phil Weimer-a'n goal hnihna a tauh lut leh bawk. Second half minute 56-naah Malsawmfela'n penalty hmang ṭangkaiin Mizoram beiseina a rawn siam a, amaherawhchu substitute Ralf Kettemann-a'n minute 83-naah German team goal thumna a khung a, 3-1 in inkhel a tawp.

Inkhel chu

German player-te an thiam a, inkhelh ṭan tirh phata ball an inpe kual a hmuhnawm nghal. Mizoram player-te'n khelmual luh thut luhai an nei a, Borussia Dortmund youth system chhuak Eugen Schiffmann-a'n a ball thiamna a hmang ṭangkai a, a penalty hlawhchhuah chu team captain Bayern Munich II player hlui Wohlfarth-a'n a pet goal. Referee thutlukna mipuiin hriatthiam har an ti.

Mizo player-te'n goal an chhuah hnuah ball an pe inkual ngam a, Lalrinzuala cross Lalnunmawia tauh chu MS Dawngliana tan goal khung theihna tur ni mah se BVT forward-in German keeper Arne a pass. Mizoram khelah hmasawnna hmuh tur a awm a, MPL1 best player R. Laldanmawia'n German defender a bum a, amaherawhchu Sialhawk tlangval pet hi goal tur chuan a na tawk lo.

German team-in minute 25-naah an dinhmun an sawhnghet a, an lenna hmang ṭangkaiin Germany U15 tana khel tawh Adam Fall freekick chu Weimer-a'n chiang zetin a tauh lut. First half hun tawp lamah Mizoram goal bawh a na a, Danmawia leh Mawitea te ball pet chu a goal teuh hle.

Second half-ah BVT player Lalruatfela Zote leh Ramfangzauva te an rawn lut a, Republic Vengthlang tlangval Fela Zote-in German player-te a bum ngam a, inkhel a nung sawt bawk. German defender penalty area-a a handball vangin Mizoramin penalty an hmu a, Sawmfela'n substitute Germany junior keeper hlui Jonas Emes a bum chiang hle.

Mizoramin goal an khung hnuah inkhel a nung sawt a, German lamin an sawi lawk angin national jersey nena chak loh an duh lo tih a chiang. Mizoram captain Lalrinchhana kaihhruaiin German rallian an dang zo lo a, substitute Kettemann-a'n minute 83-naah a khung chiang hle.

Second half-ah Dawngtea'n German tlarhnung tibuai ve zeuh mah se a kawppui Sawmfela chetṭhat ni a nih miau loh avangin Mizoramin goal khat bak an khung thei lo a, 3-1 in German Students National Team an chak.

An inthlau

German team-in vawi 639 zet ball an inpe kual a, chung zinga 518 chu an pass dik. An pass dik percentage hi 81.06 % a ni phal hial. German midfielder Nico Schneck chuan, "Awlsam taka ball pass turin technique neih ṭhat a ngai a, player ṭha chu awlsam takin field chhungah a che ṭhin. Player hmuhnawm bik Ronaldinho leh Messi te ang hi chu an awm a, amaherawhchu field chhung-ah chuan awlsam taka khelh thiam a pawimawh," a ti.

Mizoram hian vawi 385 ball an in pass kual a, vawi 224 an in pass dik. Mizo pass dik percentage 58.18% chauh a ni a, Mizoramin hmasawnna tur an nei tih a chiang.

Inkhel chungchang

Mizoram coach HC Zarzoliana chuan, "Santosh Trophy atana inpuahchahna ṭha tak a ni a, kan khingpuite kha an ṭha hret a, khelh a har a ni. Ka player-te khelh danah ka lungawi a, 3-1 a chak loh hi result chhiaah ka ngai lo," tiin a sawi.

German team head coach Marcus Jung chuan, "Mizoram XI kha team ṭha tak an ni a, player-te khan ball an thiam a, an inpass thei bawk. Chutihrualin tactic lamah erawh hmasawnna tur a la tam hlein ka hria," tiin Vanglaini palai a hrilh.

An lawm

Germany team technical advisor Arunava Chaudhuri chuan, "Hoffenheim rawn kal ṭum aiin tun ṭuma Mizoram inbuatsaihna a ṭha zawk a, kan lawm takzet a ni. Hun remchang a awm a nih chuan Mizorama rawn let leh ngei hi kan duh," tiin MFA thlen dan leh entu mipui chunga an lungawi thu a sawi.

German team coach Marcus pawhin lawmthu sawiin, "India rama kan vawi khat rawn kalna a ni a, min lo thlen dan hi kan hre reng ang. Inpuahchahna hun ṭha kan neih loh avangin duhthusamin khel thei lo mah ila theihtawp kan chhuah avangin mipui pawhin hmuhnawm an tih ngei ka beisei. Germany-a kan let leh hunah pawh kan hun tawn hi hun rei tak kan sawi ang," a ti.

ZoFooty Statistics

Mizoram XI Germany

Miz : Malsawmfela 56'

Ger : Steffen Wohlfarth 9'; Phil Weimer 25'; Ralf Kettemann 83'

1 Goals 3

35% Ball Possession 65%

14(5) Shots (On Target) 16(9)

3 Corner Kick 6

385(224) Pass (Pass Complete) 639 (518)

0 Yellow Card 0

0 Red Card 0