Guardiola nen min khaikhin suh u - Zidane

Real Madrid boss thar Zinedine Zidane chuan Bayern Munich coach Pep Guardiola nena khaikhin a duh loh thu a sawi.

Kum 43-a upa Zidane hian Thawhṭannia Real Madrid-in an ban tak Rafael Benitez chu Spanish club lian enkawl tur hian a thlak a, amah ang thoa player ropui ni ṭhin Guardiola nen hian khaikhin an ni nghal.

Mahse Zidane chuan, "Guar-diola nen hian min khaikhin su. Ani chuan thil ropui tak tak a ti tawh a ni," tiin coaching lama a aia tawnhriat ngah zawk Guardiola nena khaikhin a duh lo.

Barcelona player hlui Guardiola hian inkhelh a chawlhsan hnuin Barcelona B team-a enkawl chhun-zawm a, heta ṭang hian first team enkawl lehin Nou Camp-a kum li a cham chhungin nomawi 14 lai a chawi a, a season hmasa berah Champions League, La Liga leh Copa del Rey-ah te a champion pui vek a ni.

Real Madrid legend Zidane hi Real first team enkawl tura ruat a nih hma hian Real Madrid B team a lo enkawl tawh a, Benitez-a thlak dawn tak avangin Guardiola nen hian khawthlang media-te chuan an khaikhin nasa hle.

Zidane-a hnuaiah Real Madrid-in Thawhlehni khan an training hmasa ber an nei a, fans 6,000 chuangin training hi a hmunah an en.

Theihtawp chhuahin

Zidane chuan player a nih laia ropui taka a lo khel tawhna Real Madrid chu a theihna zawng zawng nena enkawl a tum thu sawiin, "Guardiola hi coach ropui leh ṭha tak a ni a, a hnathawh hi a ropui hle a ni. Mahse, Guardiola chu Guardiola a ni a, ka theihna zawng zawng nen Real hi ka enkawl ang. Tu nen mah ka in khaikhin dawn lo. Player ka nih laiin tu nen mah ka inkhaikhin ngai lo a, coach ka nih tak avanga ka tihna chhan tur ka hre lo," a ti.

Ṭha takin Bale

Zidane chuan khawvela player manto ber Gareth Bale chu Real player pawimawh ber pawl a nih chhunzawm zel tur thu a sawi.

French legend chuan, "Player ropui leh thiam bik a ni a, a khelh ṭhat theihna tura a mamawh ang zawng zawng chu ka pe vek ang. Rafa Benitez ban a nih avangin a lunghnur ang tih ka hria a, mahse Rafa-a'n ṭha taka a enkawl ang khan ka enkawl dawn a ni," tiin Benitez nena innel tak Bale-a chungchang a sawi.

Hnehna chang turin

FIFA World footballer of the year ṭum thum ni thei Zidane chuan, "Tum chiang tak ka nei a, chu ka tum chu ka hlen ngei theihna turin theihtawp ka chhuah ang. Football ṭha tak khelh hi he hmuna kan tuipui ber a ni a, chu chu chhunzawm zel ka duh. Attacking game hmuhnawm tak khelh ka duh a, a bak a awm lo," tiin game hmuhnawm tak fan-te chhawpchhuah sak a tum.

Zidane chuan, "Hnehna chan zel hi he club-ah hi chuan a ṭul a ni tawp. He club hian a duh ber chu Champions League nomawi chawi a ni fo ṭhin a, chu chu tihhlawhtlin ka tum dawn a ni," a ti.

Real an hlim

Zidane chuan a player-te chu an hlim thu leh football-ah chian an rilru a awm thu a sawi.

French legend chuan, "Tunah hian rilru hlim takin ka awm a , mahse coach tan inpeih vek chu thil har tak a ni. A bik takin level sang taka coach la ni lo tan inpeih a harsa hle. Mahse, mak tak chu ka rilru hi a inpeih em em a, ka hlim a, ka phur a, chu chuan min pui nasa hle ang," a ti.