ISL khelh tum East Bengal beidawng lo

India rama football inelna sang ber Indian Super League khel turin East Bengal an la beidawng lo a, club executive committee member Debabrata Sarkar chuan fan-te chu dawhthei taka nghak hram hram turin a ngen.

Debabrata Sarkar chuan, "Kan tan kawng a la inhawng reng. A tirah kha chuan ISL khel turin 50% vel chance kan neiah kan ngai a, mahse sum lama min puitu turte nen inbiakna a kal zel tak avangin 80% in kan chiang tawh zawk hial a ni," a ti. 

Sarkar chuan sponsor turte nena an inbiakna chu a hmawr an bawk hnaih tawh thu sawiin, "Covid-19 vangin beisei angin a kaltluang thei lo a, hei hi chu fan-te pawhin an hriatthiam ka ring. Theihtawp kan chhuah reng a, offficial taka kan puanzar theih thuai ka beisei," a ti a, beiseina a nei sang hle. 

July 24 khan Indian Super League (ISL) enkawltu Football Sports Development Limited  (FSDL) chuan ISL club aiawhte inbiakna an neihpui a, season thar ISL-ah team 10 tel turin an rel tawh - mahse official taka puanzar erawh a awm lo thung. 

East Bengal coach hlui Subhash Bhowmick chuan, "FSDL-a thuneitute hi mi a ni leng an ni lo. East Bengal-in ISL-a fans a hruai theih zat leh TV lama inkhel entu thlenga a tih pun theih dan chu an hrechiang a ni," a ti a, East Bengal-in ISL an khelh a beisei. 

Kolkata club lian dang Mohun Bagan chuan ISL club ATK nena inzawmin season tharah Indian top flight league hi an khel dawn a, ATK-Mohun Bagan hming chawiin Bagan 'colour' awm sa chu an ring dawn. 

Hetiang boruak karah hian East Bengal-in ISL an khelh ve dawn leh dawn loh chungchangah thuthang a awm reng a, a bik takin fan-ten an ngaihven lehzual - ISL hian 'Kolkata derby' a hmu thei a nih ngat chuan league ti hlutu zinga mi a ni ang.