Brighton laka mualpho Ten Hag, United ṭantuten an au el
Manchester United-in Old Trafford-ah hlimna an hmu ṭhin a, an chan chhiat lai deuh pawhin Theatre of Dreams-ah hian chuan an thla a muang ṭhin. Tunah erawh a engkim a dang ta - Premier League club vantlang Brighton & Hove Albion-in an kulhpui Old Trafford chu an su chim. Club ṭantuten manager Erik ten Hag an au el hial!
Inrinni zan inkhel nung ṭha takah Brighton-in Man United chhul chhuak Danny Welbeck hmangin an khung hmasa a, Pascal Gross leh Joao Pedro hmangin second half-ah an khung belh bawk. Mualneitu mualphona hliah khuh turin club academy chhuak Hannibal Mejbri-a'n goal khat a khung. Old Trafford-ah Brighton 3-1 in an chak.
Tactical Battle
Manager thluak ṭha pahnih Ten Hag leh Roberto De Zerbi te inbeihna a ni a, inkhel ṭantirh lamah Man United game hmuhnawm an khel. Rasmus Hojlund-a'n inkhel bul rawn ṭanin Marcus Rashford hoin tlarhmaah an nawr a, Brighton an bet a, United-in pressure an pe ṭha hle.
Minute 15 hnuah Brighton an insiamrem a, United ni loin mikhual team-in ball an chang tam chho ṭan. Tlarhnungah Brighton-in ball an pe ngam a, thilmak a ni lo - an tih ṭhin dan a ni. Old Trafford an lenluh hma hian UCL khel tur Newcastle United an sawp tawh.
Minute 20-ah Simon Adingra chuan dinglam aṭanga cross ball ṭha a nei a, Adam Lallana-a'n lo zuan kan zeuhin Welbeck-a'n chiang takin a khung. United tlarhnung an hawi hai hle. Brighton an huaisen chhunzawm a, ball hloh mawl tawp nei loin keeper Jason Steele ball an pe ngam a, an huaisenna phenah De Zerbi-a'n fak a phu.
VAR-in United a hawisan
United tlarhmaa awm Hojlund leh Marcus Rashford te an nung ṭha a, a bikin mual vei lamah Rashford a hnawksak hle. England international hi a vanneih ṭum ni se goal khung theihna tur a nei a, mahse a harsa zawng zawng a thawh zawh tawh hnuah a finishing a tawih tawk lo.
Minute 40-naah Rashford-a'n ṭha takin a lalut a, a crossball chu Hojlund-a'n goal-ah a chantir. Danish striker theihna a lang. Mahse, VAR hmangin thil thlen dan ennawn a ni a, replay aṭanga a lan danin Rashford-a'n ball a pet hma hian ball-in goalline a pel hman niin a lang.
Referee-in goal hi a pawmsak lo a, United goal pawm lohna hi 1 cm pawh ni loin millimetre tlemte chauh a ni a, an vanduai hle.
Brighton an vul
Second half ṭantirh lamah pawh Hojlund leh Rashford te hmangin Brighton tlarhnung hmangin rum ṭhaih mah se mikhual team bawkin goal an khung. Minute 53-naah Kaoru Mitoma ball pek chu Tariq Lamptey-a'n Gross a pe leh a, Lisandro Martinez rawn lut rup chu German midfielder Gross-a'n awlsam taka bumin ṭha zetin a pet goal.
Brighton-in goal hmaah chance ṭha an hlah ṭha duh lo. Bench aṭanga rawn lut Joao Pedro chuan minute 71-naah Lamptey pek chu goal-ah a chantir. Seagulls passing a mawi a, chutihrualin United tlarhnung a pawp. A bik takin defence lai a nghet lo a, Raphael Varane awm loh an tuar a tih theih a, defensive midfielder-ten a thlawp ṭha tawk lo a tih theih bawk.
United hi 3-0 a an hnufual avangin fan ṭhahnem takin Old Tafford an chhuahsan a, Mejbri-a'n box pawn aṭanga a pet goal ve bawk mah se scoreline timawitu chauh a ni. Brighton hi vannei ni se goal dang khng thei an ni zawk. Mitoma, Evan Ferguson leh Ansu Fati ten chance ṭha an hlah vek a, Seagulls-in an phu angin 3-1 in an chak.
An au el
Man United hian Old Trafford-ah match 20 chhung chak loh an tawng tawh lo a, Brighton-in an record duhawm hi an tihtawpsak. Erik Ten Hag-a hote hian tun season-ah Brighton bakah Tottenham leh Arsenal te an hneh tawh lo a, match ngaah vawi thum an chak lo.
Dutch manager Ten Hag hi player-te nen an inkar a ṭha tawk lo a; Old Trafford aṭanga Cristiano Ronaldo chhuahtirtu manager hian Jadon Sancho nen buaina an nei mek. Brighton an hneh ṭum hian Hojlund chu minute 19 a la awmin Anthony Martial hmangin a thlak a, French forward Martial hi a che ṭha lo.
Old Trafford-ah fan ṭhenkhatin Ten Hag-a chungah lungawi lohna lantirin an au el a, club neitu Glazer chhungkaw duh loh pawl an awm bawk. Man United chhungkaw boruak a ṭha lo a, table-ah 13-naah an awm chauh avangin club ṭantute hlimna siam tur chuan result ṭha an mamawh.
Man United hian September 20, Nilaini zan hian Allianz Arena-ah Bayern Munich an hmachhawn ang a, September 23, Inrinni-ah Burnley an tlawh ang. Ten Hag-a hote result ṭha an mamawh a, chumi tur chuan an player inhliam Mason Mount, Varane leh Sofyan Amrabat te an dam vat a pawimawh ang.