Asian Games-ah Chungnunga a kal dawn

East Bengal-in an chhuah phal loh zet hnuah defender Lalchungnunga chu India tana khel turin an chhuah a, Durtlang tlangval hi Asian Games-ah Indian football team tana inlan turin a feh chhuak - India squad-ah hian Dinthar tlangval Ayush Chhetri chu a awm sa bawk.

Chungnunga bakah hian FC Goa defender Sandesh Jhingan leh Hyderabad FC rinrawl Chinglensana Singh te pawh club nen inbiakna neih a nih hnuah squad-ah telh an ni a, a tira player 18 chu player 21 an ni leh dawn tihna a ni.

East Bengal defender Chungnunga chuan, "Club lamin chhuah an rem ti leh si a, ka kal leh zawk dawn ta a ni. Asian Games a nih miau avangin a phurawm tawh a, chutihrual chuan kan match hmasa ber hi practice loa khelh a ṭul dawn tihna a ni a, a awlsam lo ang," tiin Vanglaini a hrilh - Chungnunga hi India-in squad a puan hmasak zawkah pawh a lo tel tawh.

India hian September 19, Thawhlehni hian inelna thlengtu China nen an match hmasa ber an khel dawn - nizan khan Blue Tigers hian India chhuahsanin China an pan ve chauh a, practice loin an group-a team khauh ber tura ngaih an hmachhawn dawn.

Hangzhou, China-a neih tur Asian Games football-ah hian ram 23 an inel dawn a, heng ramte hi group parukah ṭhen hran an ni - group pangaah team pali zel awmin, group pakhatah team pathum an awm thung.

Group tina a sang pahnih chu round of 16 lut chiang tur an ni a, pathumna zinga a ti ṭha zual paliin an lut bawk ang. India tan China an khirh deuh rinawm mah se, Bangladesh leh Myanmar an hmachhawn tel dawn avangin beisei tur a awm.