Pep-a'n Doku a fak

Manchester City-in September 16, Inrinni zan khan London Stadium an tlawh a, West Ham United-in player thar James Ward-Prowse hmanga an khung hmasak avangin an talbuai hman. Mahse, City tan player thar Jeremy Doku-a'n goal ṭha bik a rawn khung a, Premier League champion tan Bernardo Silva leh Erling Haaland ten khung zuiin 3-1 in hnehna an chang.

Man City manager Pep Guardiola chuan, "A khel ṭha takzet a ni. Winger dik tak a ni a, ball a keng thei a, pakhat a bum thei. Hei chauh hi a ni lo, ball pek tur player a hmu thiam. Ka lawm takzet a ni," tiin Doku a fak.

Doku hian August 24, Ningani khan Manchester city hi Rennes aṭangin pound maktaduai 55.4-in a zawm a, club tan match hnih khel tawhin tun hi a goal hmasa ber a ni. Man City hian September 19, Thawhlehni zan 12:30 hian UCL-ah Crvena Zvezda an mikhual ang.