Champion zia chhuahtu Liverpool & Tottenham

Tun season chu Premier League hmuhnawm leh ngaihnawm bik en turin inpeih tawp a ngai e - a chhan maw? Liverpool leh Tottenham Hotspur an che ṭha a, an kal ngaiin Manchester City an kal reng bawk.

Arsenal sawi hmaih a thiang lo a, hetiang boruak kara Chelsea leh Manchester United chanchin te pawh hi ngaihnawm tak a ni - a teh nan la hma deuh mah se, tun ang renga league hi a kal chuan fixture tawp ni thlengin chiang lo a la tam dawn.

Inrinni zan khan Liverpool-in Wolver-hampton Wanderers lakah goal chhuah hmasa mah se, Cody Gakpo, Andy Robertson leh Hugo Bueno (own goal) hmangin an chhanglet a, khualmualah 3-1 in Liverpool an chak daih!

Sheffield United-in Gustavo Hamer goal hmangin Tottenham Hotspur lakah hma an hruai a, chak an inbeisei. Mahse, Spurs hian hun pek belhah Richarlison leh Dejan Kulusevski hmanga chhangletin, 2-1 in 'comeback' ropui an lantir.

Reds an nawi!

Wolves khelmualah Liverpool an lenglut, tun season-a team indinthar hian harsatna nei loin point thum an hlawh chhuak mai tura ngaih a ni. Mahse, beisei angin thil a thleng lo a, minute sarihna lekah Hwang Hee-chan chuan Wolves tan goal hmahruai a khung.

Liverpool hi insiamrem zui mai tura ngaih ni mah se, an insiamṭha lo. Hrem vanga inlan thei lo Virgil van Dijk leh Trent Alexander-Arnold tel loin Reds tlarhnung a nghet tawk lo a, midfield lah an inthuam ṭhat hma midfield ang mai an ni!

Wolves midfielder pahnih Joao Gomes leh Mario Lemina ten Liverpool midfield man to an hliah khuh a, Jeanricner Bellegarde leh Neto te counter attack-ah an hlauhawm ṭhin hle bawk.

Liverpool boss Jurgen Klopp chuan, "First half-a kan khelh dan kha chu, car park-a inhmu hlim hlawt, infawmkhawm chawp a, rawn inkhel ang mai kan ni. Kha aia chhia kha chuan a khelh theih loh," a ti!

Reds an tho

Mahse, second half-ah team lian zawk danglamna a lang. Klopp-a'n player a siksawi a, khel ṭha lo Alexis Mac Allister la chhuakin Luis Diaz a luhtir a, Colombian forward luh hnuah Liverpool an hlauhawm sawt - minute 55-naah si phurh an sut nghal.

Mohamed Salah chuan a sir aṭanga ball pet pheiin Gakpo chuan chiang zetin goal-ah a pet lut. Klopp-a'n Gakpo leh Diogo Jota la chhuakin, bench aṭangin Harvey Elliot leh Darwin Nunez te a luhtir zui a, German coach-in thutlukna a siam sual lo chhunzawm zel.

Nunez hian chance a nei zui a, mahse, goalkeeper Jose Sa leh defender Max Kilman ten an dang hman. Liverpool an hlauhawm tawlh tawlh a, minute 85-naah an thawhrah an seng ta nge nge - Salah siamsak bawk chu Andy Robertson chuan goal-ah a chantir.

Hun pek belhah Liverpool chak nemngheh nan Elliott chuan a khung ve leh a, mahse, goal hian a luh hmain Hugo Bueno ke a per a, own goal angin a hnuah ziahluh a ni.

Team huaisen Spurs

Coach thar Ange Postecoglou hnuaiah Spurs an hmuhnawm ṭhin a, Inrinni zanah pawh thawnthu a danglam lo - mahse, mikhual Sheffield tan Gustavo Hamer chuan minute 73-naah goal hmahruai a khung a, Sheffield tan goal venhim tum zui bak tih tur dang a awm lo.

Sheffield tan goalkeeper Wes Foderingham a rintlak a, kum 32 mi English keeper hian Spurs khung ngei tur nia lang chu vawi tam a dansak - hun pek belh minute riatnaa Richarlison ball tauh erawh dan a tan a harsa tawh a, minute hnih hnuah Kulusevski chuan chakna goal a khung zui.

Richarlison hian tun hnaiah a mimal harsatna avanga psychologist a rawn tur thu a sawi a, a nun a buai - mahse, Inrinni zanah player huaisen zia chhuahin, goal a khung bakah Kulusevski khung tur a siamsak bawk.

Postecoglou chuan, "Rilru fim taka thil ngaihtuah hi a ṭul fo a, Richarlison hian a talent hi a theihngilh tur a ni lo - footballer ṭha tak a ni," a ti a, "He team hian thathona leh tih hram hramna kan nei tlat a, team indinthar mek kan nih avangin chumi hmuh chu a nuam êm êm a ni," tiin a team a fak bawk.

Villa an vannei

Inrinni zanah inkhel hmuhnawm tak tak hmuh tur a awm a, chung zinga sawi hmaih thiang lo chu Aston Villa-in 3-1 a Crystal Palace an hneh chu a ni - Villa hian goal an chhuah hmasa a, hun pek belhah goal hnih khungin an chak!

Second half ṭan aṭanga minute hnihnaah Palace hian Odsonne Edouard hmangin goal hmahruai an khung a, a siamsaktu Jean-Philippe Mateta chu fak tlak a ni. Villa Park-ah goal dang a luh lawk loh avangin Palace hi an chak mai a rinawm hman.

Mahse, minute 87-naah Jhon Duran chuan si phurh a sut a, hun pek belhah Chris Richards chuan Ollie Watkins titluin penalty a chawi zui - penalty pet thiam bik Douglas Luiz chuan goal-ah a chantir a, Leon Bailey chuan chak nemnghehna a khung zui bawk.

Villa-in chak lo tura an inngaih hnuah hnehna an chang a, Palace hi coach Roy Hodgson chuan a ho thei lo - kum 76 mi hi damlohna avangin a chawl hahdam a, assistant coach Paddy McCarthy chuan a kaihruai a ni.