Kolasib-in fixtures ṭha an chang

Zote Toyota MPL10 round 6 chu Kolasib-ah September 21-22, 2023 hian khelh a ni dawn. Fixtures awm dan hi table nen chik taka thlirin tualchhung football ngainatute chuan a hmuhnawm dan tur an hrethiam thei ang.

Mizoram Police-in MPL10-ah beisei an pha tawk lo a, point riat hmuin palinaah an awm mek. Chutihrualin Lalbiaksanga Colney hote hian Kolasib-ah hmahruaitu Chawnpui FC an hmachhawn dawn a, hnehna an chang a nih chuan MPL champion lai chunga awmin Aizawl an rawn haw thei ang.

I League club Aizawl FC pawh Chanmari FC hnuaiah an awm mek. MPL ṭantirh aṭanga season tina la tel ziah an ni a, team ṭha ber zinga mi an ni ziah bawk. Kolasib mipuiin Aizawl FC leh Chanmari FC inkhel an chang thei hi an vannei hle.

Ni hnihnaah tun hnaia harhtharna chang Electric Veng FC leh I Day Football champion Chhinga Veng te an inkhel dawn. Chhingcows hi coach Lalsangzuala Hmar kaihhruai a ni a, football game rang leh hmuhnawm khel ṭhin an ni.

Khaw mipuite hmuh châk tur erawh khawtual club Project Veng FC an ni a, an khingpui tur hi an hnuaia awm FC Venghnuai an ni. Venghnuai hi nikum finalist an ni a, Kolasib-ah Project Veng an hneh theih chuan table mawngphah an chhuahsan ang.