Bayern tan Kane-a goal a tawk lo

Bayern Munich-in ṭum hnih ngawt an elpui Bayer Leverkusen lakah hma hruai mah se an hum zo lo ve ve a, 2-2 in an inhnehtawk. Bundesliga match li khelh tawhah chak vek thei an awm lo a, Xabi Alonso enkawl Leverkusen hian goal difference hmangin hma an hruai a, anmahni ang bawka point 10 hmu Bayern chu pahnihnaah an awm.

Allianz Arena-ah Harry Kane-a'n Bayern ṭantute lawmna a siam a, minute sarihna lekah a tauh goal. Leverkusen-in freekick hmangin siphurh an sut a, minute 24-naah Alex Grimaldo-a'n mawi zetin a pet kual lut a, keeper Sven Ulreich tan dan ngaihna a awm lo.

Second half-ah Kane-a'n keeper chauh a hmachhawn hnuah a pet goal thei lo a, amaherawhchu minute 86-naah Leon Goretzka-a'n goal pawimawh a khung. Bayern-in chakna turah an ngai a, mah se injury time-ah penalty an chawi a, Alphonso Davies-a fimkhur tawk loh vang a ni.

Exequeiel Palacios rawn pen chhuakin penalty aṭangin si phurh sutna goal a khung a, 2-2 in inkhel a tawp. Harry Kane-a'n Bayern tan league match li a khelh tawh aṭangin goal li a khung a, bul a ṭan chhe lo. Bayern erawhin an elpui lakah an mualah point an hloh thung.

Bayern hian September 20, Nilaini zan hian Allianz Arena-ah Premier League lama talbuai mek Manchester United an mikhual dawn. Bundesliga inkhel dangah Bayern elpui tura ngaih RB Leipzig leh Borussia Dortmund ten hnehna an chang.