Barcelona an chak nuamsa

Spanish La Liga-ah Barcelona-in tlawm an nei lo tluang zel a, an mikhual Real Betis chu Inrinni zan khan 5-0 ngawtin an sawp - Joao Felix, Robert Lewandowski, Ferran Torrres, Raphinha leh Joao Cancelo ten goal khat ṭheuh an khung.

Barcelona-in hnehna an chan avangin league match nga khelh tawhah point 13 an nei der. Hetihlai hian Barca elpui Atletico Madrid erawhin hnehna an chang zo lo a, Valencia khelmualah 3-0 in Diego Simeone-a naute an tlawm.

Valencia tan Hugo Duro chuan goal hnih a khung a, Javi Guerra chuan goal khat a thawh bawk - league match hnih a zawna an tlawm hnuah Valencia an chak! Nizan khan Real Madrid leh Real Sociedad inkhelin, he thu buatsaih a nih lai hian result kan hre hman lo.

Mi thar Felix

Barca tan Oriol Romeu chuan minute 25-naah ball a thlawh lut a, a ball thlawh luh hi Felix chuan a tirah pet sual deuh mah se insiamrem lehin goal-ah ṭha zetin a khung a, Atletico Madrid aṭanga loan-a an hawh forward theihna sanzia hmuhtirin kan awm - Barca tana a goal hmasa ber a ni bawk.

Catalan club-in goal an khung aṭanga minute sarihna lekah goal kan hmu lehnghal. Chelsea defender hlui Andreas Christensen-a ball pet luh ṭha tak chu Felix-a'n lo dawng mai loin a kap karah a kaltir a, Lewy ke bul a thleng.

Polish striker hian a thiam a la theihnghilh lo tih pholangin goal-ah a chantir zui a, league match hmasa pahniha goal a khung loh avanga sawisel hlawh hman striker hian league match thum chhung a zawnin goal a khung leh ta.

Torres siamtharna!

Minute 62-naah Barca-in freekick hmangin an goal hnihna an khung a, a khungtu chu Torres a ni - Manchester City forward hlui hian tun season-ah personal trainer-te lain, nasa takin a bei a, a rah a hmu mek.

Torres-a goal kha kum 2021-a Lionel Messi hnua Barca-in direct freekick hmanga goal an khung leh hmasak ber a ni a, hetih chhung hian vawi 41 freekick an pet hman.

Barca tan Raphinha chuan ṭha zetin an goal lina a khung a, City aṭanga loan-a an hawh Cancelo pawhin a thiam a la theihnghilh lo tih pholangin, an goal ngana a khung ve bawk - Barca an chak chiang hle.