Enrique enkawl PSG an chak lo

Kylian Mbappe-a'n goal hnih khung mah se Paris Saint Germain chu Nice lakah 3-2 in an chak lo a, coach thar Luis Enrique enkawlna hnuaia an khelh chinah an chak loh vawi khatna a ni.

Zirtawpni zan Paris khawpuia Ligue 1 inkhelah mikhual Nice lamin Terem Moffi hmanga an goal hmahruai chu Mbappe-a'n a sut a, mahse Gaetan Laborde-a'n a khung belh bakah yard 18-a hla aṭangin Moffi bawkin a khung belh bawk.

Hun tawp dawnah Mabppe chuan sut ṭhen ve leh mah se an sut zo hman lo a, anmani mualah ngei Ligue 1 champion lai an tlawm a, nomawi humhim tur chuan an kawng a hautak chho dawn niin a lang.

Mbappe hian France tana a fehchhuahna lamah hliam tenau a tuar a, mahse inkhelh hmaa Enrique-a'n a sawi lawk ang ngeiin a dam hman, tun season match li a khelh aṭangin goal sarih a khung der.

Amaherawhchu, Mbappe inlan hma an match hmasa berah PSG hi an chak zo lo a, vawi hnih chu an khingpuite nen an inhnehtawk tawh bakah tunah an tlawm leh tak avangin match nga aṭangin point riat chiah an hmu.

PSG coach Luis Enrique chuan, "Nice kha team ṭha leh inremkhawm fuh tak an ni a, ruahmanna ṭha tak siamtu coach Francesco Fariol khan fak a phu hle, a chak phu zawk an ni.

"Club lian dangte elphak a, inelna tak tak hmachhawna paltlang tur chuan tun aia ṭha zawkin kan khelh a ngai a, a bul ṭanna tur chu keimah ka ni," tiin Champions League lam a thlirlawk nghal bawk.

PSG club neitu lamin an duh ber chu Champions League a ni a, an la hlawhtling ngai lo. Tun season UCL an match hmasa ber atan Thawhlehni zan hian Borussia Dortmund nen group match an khel ang.

Kum 34 mi Francesco Farioli enkawl Nice hian season bul an ṭan fuh hle, match nga aṭanga point kua hmuin PSG chungah an awm thung a, hmahruaitu AS Monaco chu point khatin an phak lo - Monaco hi match khatin an khel tlem thung.