AC Milan sawptu Inter Milan
Milan Derby a nih tawh hi chuan a boruak hi a danglam a, team pahnih ten chak zawk nih ngei ngei an duh ṭhin a, nasa taka chak lo nih phei chu an hreh ngawih ngawih ṭhin.
Inrunni zan khan tun season atana Milan Derby hmasa ber khelh niin, mualneitu zawka ṭang Inter Milan chuan an hmelma leh elpui ni bawk AC Milan chu 5-1 ngawtin an sawp.
An intawn hma khan chuan tun season Serie A match vawi thum khelh china chak vek ve ve an ni, tunah erawh Inter lamin 100% chak record an neih an chhawmnun laiin Milan erawh an tlawm ta a ni.
Goal a sur
San Siro-a inkhelah goal kan hmu har lo, minute ngana lekah Manchester United leh Arsenal tana khel tawh Henrik Mkhitaryan chuan goal hmahruai a khung a, second half-ah goal dang a khung belh bawk.
Inter tan Marcus Thuram, Hakan Calhanoglu leh Davide Frattesi ten goal khat ṭheuh khung belhin, mikhual team lam goal neih chhun hi Rafael Leao khung niin an mualpho lutuk tur a hliah khuh phak lo.
Forward Thuram a hmuhnawm a, Inter hmatawng hian ball hlauhawm a pe chhuak nasa. Lautaro Martinez pawhin goal khung chiah lo mah se a khel ṭha, a penalty hlawh chhuah hmangin goal khat an khung theih phah.
Simone Inzaghi enkawl Inter Milan hian ball possession 40% chauh an chang a, mahse a pawimawh laiah an che fuh chat zel a, an tlarhma an hriam bakah an hnung lam an phui ṭhat avangin Milan an sawp thei.
Eng nge an sawi?
Inter Milan coach Simone Inzaghi chuan, "A hunah tak goal kan khung chat chat thei khan min ti lawm hle, a tira inkhel bul ṭantu player 11 chauh ni loin bench aṭanga lut zawng zawng pawhin an khel ṭha vek.
"Tunah chuan hmabak hautak kan nei dawn, chumi atan chuan kan inbuatsaih leh nghal ang," a ti. Season hmasa Champions League finalist hian Nilaini zanah Real Sociedad an lenchilh ang.
AC Milan manager Stefano Pioli chuan, "Inter Milan nen hian kan inthlau em tih min zawt a, kei chuan kan inkar hi tlemte chauh niah ka ngai, tun ṭum kan in khel phei chu minute 70 chhung kha keima mawhphurhna niin ka en let ang.
"Tihsual tlemte kan neih zeuh zeuh lai an rawn chhawr ṭangkai ṭhin kha an vannei ve bawk, siamṭhat harsa erawh a ni lo ang," a ti. Milan hian Thawhlehni zanah Newcasle United nen UCL an khel zui leh nghal dawn a ni.
Juve an chak
Serie A inkhel dangah Juventus chuan an mikhual Lazio chu 3-1 in an hneh. Old Lady tan hian striker Dusan Vlahovic-a'n goal hnih a khung bakah Federico Chiesa chuan a khung belh bawk.
Tun hnaiah Juve hian khelmual pawn lam buaina neuh neuh an nei, an midfielder ṭha Paul Pogba chu damdawi hman phal loh a hmang tih hriat chhuah a nih avangin an hrem lailawk mek.
An defender hlui Leonardo Bonucci chuan Juve nen an inṭhen dana a lungawi loh thu leh, dan anga hma a lak tur thu a lo sawi ve bawk, hetiang brouak kara hnehna an chang thei hi a lawmawm ang.
Season hmasa khawn Juve hi dan bawhchhiat avangin Serie A point 10 paihsak an lo ni tawh a, tun season-ah thawh chhuah leh tum mah se buaina ten a la kiansan vek lo a ni.