Ningani zana inkhel tur Atletico player Angel Correa leh Sime Vrsaljko ten Covid-19 an kai

European football-a club inelna ngaihhlut hlawh ber Champions League-in thu thar hriat nuam lo tak an nei leh ta a, Ningani zana inlan tur Atletico Madrid squad-ah he hri leng kai hi mi pahnih an awm. 

Atletico hian Covid-19 kai an player pahnih hming hi a tirah an puang zar duh lo zet a, mahse nizan khan Spanish club chuan player pahnih hi first team player ṭangkai Angel Correa leh Sime Vrsaljko an nih thu an puang.

Diego Simeone team-te hian Pathianni khan test an nei lehnghal vek a, Atletico chuan, "First team leh coaching staff-ten Pathianni khan test an nei leh a, an vaiin a negative vek a ni," an ti. 

Atletico Madrid hian champion lai Liverpool hnehin Champions League quarterfinal hi an lut a, German club ṭha RB Leipzig nen inhmachhawn tura tih an ni. 

Mahse, Inrinni khan dan pangngaiin Lisbon-a zin tur Atletico player leh staff-te chu test neih vek an ni a, tlai lamah result hriat nghal niin Correa leh Sime Vrsaljko ten hri leng an kai thu hi an tichiang. 

Atletico chuan player pahnih hi dan anga an inkhunghran nghal thu an sawi a, "Mahni in lamah an inkhung hrang ve ve a ni," an ti a, Pathianni khan player leh coaching staff dang zawngin test an nei leh zui - vanneithlak takin an him. 

Atletico an zin 

Atletico-in a tir lamah player pahnih hming an puanzar duh loh avangin an kal zel dan tur pawh an inrinsiak nasa hman hle - mahse UEFA chuan nimin khan thuchhuah siam ve bawkin Atletico an inkhel dawn. 

Spanish club hian Ningani zan dar 12:30-ah RB Leipzig nen quarterfinal an khel dawn a, kaltlangpui tur a nih takah chuan Correa leh Vrsaljko tel loa an khelh a ngai dawn tihna a ni. Atletico squad-ah hian academy player Alex Dos Santos, Manu Sánchez, Riquelme leh Toni Moya chu hruai tel an ni a, an ṭhat dan berin Simeone-a naute an khel dawn lo. 

UEFA medical danah first team squad-ah player 13 hman tur an awm chuan game ṭhulh theih a ni lo a, Covid-19 a nih miau avangin a 'case' danglam deuh mah se UEFA chu a dan neihsaah ding nghetin inkhelh a kaltlangpui dawn. 

European football-a thuneitu sang ber chuan nizan khan thuchhuah siamin, "Ruahman sa angin inelna hi kaltlangpui tur a ni tih bak sawi theih kan nei rih lo," an ti. Thla hmasa khan Real Madrid forward Mariano Diaz leh Sevilla player Nemanja Gudelj te chuan Covid-19 an kai tih hriat a lo ni tawh a, mahse hei erawh a hunlai hian an inkhelh hun a la hlat deuh avangin an buai phah lutuk lo thung. 

Covid-19 vangin Champions League hi March thla khan tihtawp lailawk a lo ni tawh a, Inrinni leh Pathianni zan khan last 16 second leg khelh hmabak la awm te chu khelh zawh a ni tawh. 

Hetiang a nih avang hian season dang angin inelna hi home & away pawha khelh chhunzawm theih a ni lo a, UEFA lam chuan venhimna leh endikna uluk thei ang bera kalpui chungin hmun khatah inelna hi neih turin a ruahman. 

Lisbon, Portugal chuan quarterfinal chin inelna zawng hi a thleng dawn a, tournament anga inelna kalpui a nih tawh dawn avangin 'vanneih' theih a ni.