Copa del Rey Messi goal hnih hmangin Barcelona-in Espanyol hneh

Nilai zan khan Barcelona chuan Lionel Messi goal hnih khung hmangin Espanyol chu Copa del Rey last-16 first leg-ah an hneh. Thla ruk zet an nghah hnuah Arda Turan leh Aleix Vidal te chuan Barca tana an match hmasa ber an khel bawk.

Tun hnai ni 11 chhungin Catalan derby vawi thum khelh a ni dawn a, club pahnihte hi January 2 khan La Liga-ah goal awm loin an lo inhnehtawk tawh a, karleh Nilaini hian Copa del Rey last-16 second leg an khel leh bawk ang.

Inkhel chu

Nou Camp-a inkhelah beisei loh takin mikhual Espanyol an che fuh hmasa zawk a, striker Felipe Caicedo hmangin minute kuana lekah hmahruaina goal an khung.

Amaherawhchu, Barca an buai phah lo. Karleh Thawhṭana sem tur Ballon d'Or chawi-mawina dawng tura chhawpchhuah zinga mi Messi chuan minute 13 leh 44-naah goal a khung chhunzawm ve nghal a, hun chanve a zawh chuan Bacelona lamin 2-1 in hma an hruai let thung.

Second half-ah Messi bawk a langsar chhunzawm a, minute 49-na a defender Gerard Pique goal khung tur leh hun tawp dawna Neymar goal khung chu a siamsak ve ve a ni. Espanyol player pahnih Hernan Perez leh Pape Diop te hnawhchhuah an nih avangin Barca-in goal li an khung hi thil mak a ni hran lo.

Argentina captain hi hun rei tak hliam vangin inkhel thei lo mah se a thiam a la theihnghilh lo a, a hliam dan hnuah match 21 a khelh aṭangin goal 14 a khung leh der tawh.

A vawi khat nan Turan leh Vidal

Nipui transfer lai khan Barcelona hian Atletico Ma-drid aṭangin Turkey international Tu-ran chu pound mak-taduai 24-in an la lut a, ani hian Espanyol lakah inkhel bul a
ṭan. Defender Vidal pawh Dani Alves thlakin minute 67-naah khelmual chhungah a rawn tlan lut.

Barcelona hian FIFA dan kalha player naupang an lakluh avangin an player lak thar pahnihte hi thla ruk chhung an chhawr thei lo a, hun rei tak an nghah hnuah an club thar tan an inlan thei ve chauh a ni.

Barca coach a lawm

Barcelona coach Luis Enrique chuan hnehna an chan vanga a lawmthu sawiin,"Andreas Iniesta hi kan team khaikhawmtu a ni a, Messi hi hnehna min chanpui thei tur khawpa ṭha a ni. Ka player te khelh danah ka lawmin ka lungawi hle. Derby match a nih tawh chuan inkhelh a awlsam ngai lo a, chuti chunga goal li kan khung thei hian min ti hlim. Mahse, minute 90 dang kan la inkhel dawn tih erawh kan hriat reng a ngai ang," tiin a sawi.

Atletico chak zo lo

Inkhel dangah La Liga hma-hruai mektu Atletico Madrid-in hnehna an chang zo lo a, khualmualah Rayo Vallecano nen 1-1 in an inhnehtawk.

Rayo Vallecano khelmual Estadio de Vallecas hmuna inkhelah mualneitu lam tan Nacho Martinez chuan minute 34-naah goal hmahruai a khung a, mikhual Atletico lam tan midfielder Saul Niguez chuan an si phurh a sut hram a ni.

Atletico Madrid coach Diego Simeone chuan, "Kan inhnehtawk result hi kan inkhelh dan nen pawh a awm reng a ni. Last 16 a nih tawh avangin team ṭha lo a awm theih tawh lo a, kan khelmualah erawh thil a danglam tawh ka beisei," tiin second leg-ah chuan hnehna chan a inbeisei thu a sawi.

Valencia tan Negredo

Gary Neville-a enkawl Valencia tan Manchester City striker hlui Alvaro Negredo chuan hat-trick a siam a, Rodrigo chuan goal khat khung bawkin Granada lakah 4-0 in hnehna an chang.

Manchester United player hlui Neville a naute hian January 14 khian second leg khel turin Granada an pan ve leh ang.