League Cup semifinal City barkhaihtu Everton tan final a hnai

Nilaini zan khan Capital One Cup semifinal hnuhnung zawk khelh a ni a, Everton chuan an mikhual Manchester City chu 2-1 a hnehin Wembley an pan zel.

League Cup semifinal inkhel pahnihah Liverpool leh Everton an chak ve ve a, second leg khelh tur la awm mah se February 28-a League Cup final Wembley-a khelh a nih hunah Merseyside derby hmuh theihna chance a sang hle.

Goodison Park-a inkhelah mualneitu team tan Ramiro Funes Mori chuan chawlhlawk hma hretin goal hmahruai a khung a, mikhual team City tan Jesus Navas chuan minute 76-naah an si phurh a sut.

City-in an si phurh an sut aṭanga minute hnihna lekah Everton tan Romelu Lukaku a inlar a, Belgian winger hian Gareth Barry-a ball cross duh-thusam chu awlsam takin a tauh lut. Lukaku tan a match hnuhnung 12-ah goal 12 a khungna a ni a, tun season-a inelna hrang hrangah goal 19 a khung tawh bawk.

City vanduaina

Everton tan John Stones leh Lukaku-te'n goal khung mah se offside vanga pawm a ni lo thung. Funes Mori-a'n Ross Barkley goal shot per goal-a a lo chantir erawh Lukaku a offside niin lang mah se referee-in a ham tlat lo.

Kevin Mirallas-a'n penalty box chhunga Navas a tih tluk hnuah City-in penalty beisei mah se pek an ni lo bawk a, Manchester City tan referee thutlukna pahnih hi chak loh chhuanlama hman tham a ni.

City manager Manuel Pellegrini chuan, "Everton goal hmasa zawk kha offside chiang tak a ni a, Jesus Navas an tih tluk avang khan penalty chawi tur an ni bawk. Khualmuala 2-1 a tlawm hi result chhe tak a ni a, mahse kan khelmualah 1-0 bakin chak kan mamawh lo. Capital One Cup final khel tur hian kan kal theih ka la ring tlat a ni," a ti.

Khel ṭha Barry

Everton-in Manchester City an hneh zana player ṭangkai ber chu Gareth Barry tih ngam a ni. English midfielder hian khelmual chhungah a tawnhriat ngah tawh a pholang a, City tlarhmain Everton tlarhnung an ṭhiat tur dang chattu a ni a, Everton tlarhma a pui ṭha bawk.

Barry bakah Everton tan Barkley a langsar a, English midfielder hian ṭum danga a khel phak lo mah se a dan pangngaiin a tlan taima a, khelmual chhungah hmuh tur a tam a, City player-te chhaih mangangtu ber a ni.

Khawiah nge Toure?

City innghahna chu mid-fielder Yaya Toure a ni. Mahse, Ivorian midfielder hian Nilaini zanah erawh beisei a phak lo a, City midfield-ah a thamral chiang hle.

Kum 32-a upa midfielder hian Everton midfielder khel ṭha em em mai Mo Besic-a chelh lo a ni ber a, Bosnian midfielder hian a thiamna leh tharum ngahna hmangin Toure a dah nil a, City innghahna player hi a kum a tam ve ta tih khelmual chhungah a lantir.

Inkhel chhehvel

Lukaku-a'n tun season-ah League Cup match nga khel tawhin goal li a khung.

Navas-a tan a goal khung hi September 2014 hnua City tana goal a khung leh hmasak ber a ni. Nilaini zana goal a khung hma hian inelna hrang hrangah City tan match 66 khelin goal a khung lo.

Pellegrini-a'n City a en-kawl hnuah Everton vawi ruk hmachhawn tawhin vawi li a chak a, vawi khat an inhneh-tawkpui a, Nilaini zan kha an tlawm hmasak ber a ni.

Martinez thukhawchhang

Everton manager Roberto Martinez chuan khel ṭha Gareth Barry fakin, "Barry anga player mahni mawhphurhna hrechiang hi ka la tawng ngai lo. Barry hian a theihna leh thiamna ang hian chawimawi a hlawh lo zawk a ni. Vawiina player naupang
ṭha tak tak kan neih chhan chu entawn tur Gareth Barry-te ang an awm vang hi a ni," tiin a midfielder chu a fak hle.

Spanish manager chuan sawi chhunzawmin, "Ka tan chuan Barry hi English player awm tawh zinga ṭha ber pawl a ni. Kumin chhungin Premier League match 600-a khel hman ngei ang," tiin Aston Villa leh City tan pawha lo khel tawh
ṭhin a player chu a in fit tawk thu a sawi bawk.