Juventus an sang tual tual

Champion lai Juventus-in season bul ṭan fuh lo mah se tun hnaiah erawh an khel ṭha tluang hle. Nilaini zan khan Verona lakah si thum faia hnehna changin a zawnin league match riat chhung hnehna an chang ta.

Turin-a inkhelah Juve tan Paulo Dybala, Leonardo Bonu-cci leh Simone Zaza te chuan goal khat ṭheuh an khung. Juve striker Dybala hian an khelmuala a match hnuhnung parukah goal nga a khung tlinna chiah a ni nghe nghe.

Serie A table mawngphaha mi Verona hian season duh-awm lo tak an hmang mek a, league match 18 an khelh tawh aṭangin chakni hmel an la hmu lo. Vawi riat chu an khing-puite nen inhnehtawkin vawi sawm an tlawm tawh a ni.

Juve hi table-a a sang pali zingah an inhlangkai leh tawh a, point 36 hmu mekin hmahruaitu Inter Milan chu point thum chauhin an phak lo tawh a ni.

Hmahruaitu Inter

Striker Mauro Icardi goal khat khung hmangin Inter Milan chuan khualmualah Empoli lakah 1-0 in hnehna an chang. Argentina striker Icardi hian tun season Serie A khelh mekah goal riat a khungna chiah a ni.

Roberto Mancini team Inter hian tun season league match ah 1-0 in hnehna an chang thei hle a, Empoli an hneh hi si khat faia an chak vawi kuana chiah a ni nghe nghe.

Inter Milan hian match 18 khelh tawh aṭanga point 39 hmuin hmahruaitu an ni a, an hnuai chiahah hian point 38 hmu pahnih Fiorentina leh Napoli an awm bawk.

Inkhel dangah AC Milan chu an mahni khelmualah Bologna lakah 1-0 in an tlawm. Milan hian point 28 hmuin table-ah pasarihna an ni mek a, fans lungawi lo chuan an player leh coach an au nawmnah hial tawh a ni.

Milan coach Sinisa Mihajlovic chuan, "Chaklo zawka ṭan hi chuan rilru a na in a hrehawm duh ṭhin hle. Min ṭan tu ten point thum hmuh an duh luat vanga min au el hi ka dem hran lo. Mahse, hei erawh ka sawichiang duh, ka naute hian chak tumin an khel a ni," tiin a sawi.