Hero I League 2015-16 an hawng ta

January 6, Nilani zan khan I-League season 2015-16 chu official-in Kolkata-ah hawn a ni. India rama football club-te inelna sang ber hawnnaah hian club pakaw aiawhte, AIFF general secretary Kushal Das leh main sponsor Hero Motocorp te an tel.

Hawnna neih zana captain ding chhuak zingah Aizawl FC captain David Lalrinmuana chauh Mizo a ni lo a, East Bengal aiawhin Khawzawl tlangval Robert Lalthlamuana a inlan ve bawk.

AIFF general secretary Kushal Das chuan, "I League hnuhnung berah match tawp ber thlengin boruak a sang a, tun ṭumah hian a danglam lo ang. Champion lai Mohun Bagan hian awlsam takin an nomawi hi an humhim dawn lo, club dang pariat hian an lallukhum hi chhuhsak an tum ang," tiin tun season I League inelna boruak a san tur thu a sawi.

I-League season 2015-16-ah hian team pakua Aizawl FC, Bengaluru FC, DSK Shivajians, East Bengal, Mohun Bagan, Mumbai, Salgaocar, Shillong Lajong leh Sporting Goa te an awm. Team pahnihte hi vawi hnih ṭheuh an inkhel kual ang a, vawi 16 ṭheuh an khelh zawh hnua a sang ber an champion ang.

Mizo aiawh Aizawl FC

I League season tharah hian Aizawl FC leh DSK Shivajians FC te hi team thar an ni. MPL champion Aizawl FC hi I League second division champion an nih vanga I League khel tur an ni a, DSK Shivajians erawh sum hma-chhuana lut an ni thung.

I League thuneitute hian hmabak nei thei tur club chu team dang entawn turin second division khel kher loin an lo dah lut tawh ṭhin a. 2013-14 season champion Bengaluru FC hi entirna ṭha tak an ni a, season hnih chhung leka player an enkawl dan bakah an supporter kalphung thlengin an entawntlak nghal hle. Chutihrualin second divi-sion khel loa I League khel nghal ve tho Bharat FC erawh season khatnaah table mawng-phahah awmin relegate lo tura hriat-thiam ni mah se an zuih ral.

Aizawl FC kalkawng hi kawng pangngai a ni a, kawng harsa zawk a ni. MPL champion hian harsa takin I League an thleng a, an fixture lah a harsa nghal hle. January 9, Inrinni hian champion lai Mohun Bagan chu Salt Lake Stadium-ah an hmachhawn dawn a, Mizoram I League match hmasa berah champion rinkai tho Bengaluru an tum nghal dawn. Aizawl FC hian an home match hi Rajiv Gandhi Stadium, Mualpuiah an khel dawn a, ani hi Mizo mipui aiawh an ni a, ṭan phu an ni.

Season thar chu

I League 2015-16 season hi thla nga chhungin khawpui parukah khelh a ni dawn a, match 72 khelh a ni dawn. India ram football ngainatute hmuh châk Mohun Bagan leh East Bengal chu January 23 leh April 2-ah an inhmachhawn ang. Kolkata club lian pahnih hian kuminah Mizoram an rawn tlawh dawn a, Aizawl FC-in RG Stadium-ah March 5 hian Mohun Bagan an hmachhawn ang a, March 12-ah East Bengal an tum lehnghal ang.

Tun season I League champion hian vaibelchhe khat an dawng dawn a, season liamta aiin nuai 30 in a tam zawk. Pahnihnain nuai 60 an hlawh ang a, pathumnain nuai 40 an dawng bawk dawn. Club-te hian season khat chhunga an vei vahna senso atan cheng nuai 45 an dawng a, match khelh apiangin nuai khat an dawng ang a, match tina chak zawkin Rs 50,000 an dawng ang.