Hliam vangin Liverpool an buai

Liverpool manager Jurgen Klopp chuan a player zingah inhliam an tam em avangin January transfer bazar-ah loh theih loha player a lakluh a ngaih mai theih thu a sawi.

Reds hian Serbian rawlthar duhawm Red Star Belgrade midfielder Marko Grujic chu kum li chhung atan pound maktaduai 5.1-in an la lut tawh a, Anderlecht, Stuttgart, CSKA Mos-cow leh Zenit St Petersburg te pawn lakluh an tum midfielder hian tun season chhung chu loan-in Serbian club lamah hian a hun a hman chhunzawm dawn thung.

January transfer-a player thar lakluh a tum loh thu lo sawi tawhtu Klopp chuan, "Tunah chuan player inhliam kan ngah em avangin player lakluh leh lakluh loh chungchang hi uluk taka kan ngaihtuah nawn a ngai tawh a ni," a ti.

Reds hian League Cup semifinal-a Stoke City an hneh ṭumin Philippe Coutinho, Dejan Lovren leh Kolo Toure-te chu an inhliam a, defender zingah Martin Skrtel leh Mamadou Sakho-te chu hliam vangin an chawl mek bawk.

Liverpool manager Klopp chuan, "Kar hnih kal ta kha chuan centre-back pathum kan nei a, season ṭan tirah centre-back panga an awm bawk. Tunah erawh pakhatmah kan nei lo," tiin defender an mamawh thu a sawi.

Central defender chhawr tur nei lo Liver-pool hian zanin dar 1:25-ah Exeter City chu FA Cup third round khel turin an hmachhawn ang.