Zidane-a hnuaia Madrid hmasawn ringtu Carlos

Brazilian legend Roberto Carlos chuan Real Madrid tana a lo khelpui tawh ṭhin Real boss thar Zinedine Zidane chu Santiago Bernabeu-ah player a nih lai ang bawka a hlawhtlin theih a beisei thu a sawi.

Indian Super League-a Delhi Dynamos enkawltu Carlos chuan, "Zidane hian coach hlawhtling ni tura theihna a nei a ni. Player a nih lai pawn Real-in harsatna a tawhin a talbuai ve ngai lo a, a khaichhuak leh mai ṭhin. He club hi a chhungril ber thlengin a hrechiang em em a, club chhungkuaa mi zawng zawng ten an zah a ni," a ti.

Carlos chuan Zidane chu La Liga-a champion tura beisei nghal chi erawh a nih loh thu sawiin, "League title a chawi nghal dawn leh dawn loh chu thil sawi harsa a ni a, mahse Real hian season ṭha tak hmangin Zidane-a enkawlna hnuaiah hma an sawn ang tih erawh ka sawi ngam a ni," tiin a ṭhianpa chu a ringtawk hle.

Brazil tana vawi 125 inlan thei Carlos chuan Real-in Benitez an ban chu mak a tih loh thu sawiin Spanish manager chuan Santiago Bernabeu-a cham rei turin a player-te thlawpna a hmuh ṭhat tawk loh thu a sawi.