Drogba hma hun a chiang lo

France chanchinbu pakhat 'L'Equipe' chuan Didier Drogba chu Chelsea-ah manager lailawk Guus Hiddink thachhang dawl turin a kir leh dawn niin a sawi.

Kum 37-a upa Drogba hian season hmasa khan Blues chu Premier League nomawi a chawi pui a, hemi hnu hian MLS club Montreal Impact-ah a kal san. Ivory Coast international hlui Drogba hian Impact tan match 14 a khelh aṭangin goal 12 a khung a ni.

December thlaa Chelsea-in Sunderland an hneh ṭum khan Stamford Bridge-ah Hiddink leh Roman Abramovich te nen hmuhho an nih avangin he thu nen hian sawi zawm a ni nasa hle. Dutch manager Hiddink chuan Blues striker hlui Drogba nena thawhdun a chak thu a lo sawi ve mek bawk.

Amaherawhchu, tun thlengin Drogba hian football chawlhsana hna dang thawh a tum leh tum loh thuah thutlukna a la siam fel lo. Hetih mek lai hian Impact lam chuan Drogba chu an hnen pana a lo kir hun tur nghakhlel takin an lo thlir thung.

Twitter-ah Im-pact chuan Drogba chung-chang ziakin, "Drogba leh Chelsea nen inbiakna kan nei ngei a, kan duh dan chuan season tharah hian kan hnenah la awm se tih hi a ni. Mahse, a club hlui lam hian a lung a ti leng a nih pawhin thil mak a ni lo ang," an ti.