Liverpool-in Tsimikas an hnim hnai

Premier League champion Liverpool-in Covid-19 hri leng vangin transfer bazar-ah sum hman nat an tum lo a, Norwich City-in left back Jamal Lewis lei an tumna an hnawlsak hnuah Olympiakos left back Kostas Tsimikas lam an hawi. 

Reds hian kum 22 mi Lewis lakluh tumin pound maktaduai 10 an thehchhuak a, an hralh leh a nih chuan Norwich-in share an neih ve theih dan tur an duang tel bawk. Mahse, Premier League aṭanga tla hlim Canaries hian hei aia tam zawka hralh theih an inbeisei. 

Liverpool hi pound maktaduai 12 thlengin an tawlh sang ngam nia sawi a ni a, mahse Canaries hian pound maktaduai 20 an chhiar nia sawi a ni. Merseyside club erawhin sum harsatna karah Andy Robertson thachhang dawltu tur man atana uchuak taka sum sen an tum lo. 

Greece international hian Greek club tan tun season inelna hrang hrangah match 45 a khel a, Super League Greece-ah champion nomawi a chawipui. Khawthlang media ṭhenkhat chuan Liverpool leh Olympiakos chu an inbe fel tawh ang hialin an tarlang. 

Kum 24 mi defender man hi pound maktaduai 11.75 a ni dawn a, kar khatah £50,000 hlawh turin Anfield-ah hian kum li chhung atan contract a ziak ang - he thuziak i chhiar meuh chuan Reds player a ni tawh hial mai thei. 

English champion hian inbiakna tlawlh thei laka inven nan Real Madrid left-back Sergio Reguilon an thlithlai bawk a, kum 23 mi defender hian Sevilla-ah loan-a khelin tun season inelna hrang hrangah match 35-a khel tawh.