Zaninah Real leh Barca inlan dawn Zinedine Zidane tan fiahna hmasa
Zanin dar 1:00-ah Real Madrid-in Deportivo de La Coruna an mikhual dawn a, Real manager thar Zinedine Zidane tan fiahna hmasa a ni ang.
French legend hi khelmual chhunga a hlawhtlin zia sawi nawn a ngai lo. Khelmual pawn lam aṭanga a naute a kaihhruai danah a ropui chhunzawm zel dawn em? tih erawh zawhna awm mek a ni a, zanin aṭangin chhanna a pe ṭan ang.
Mipui hmuh chak
Zinedine Zidane-a'n Real Madrid manager a nih hnuah attacking game a khelh tur thu a sawi a, khawvela tlarhma nei ṭha ber pawl Real Madrid-in French legend enkawlna hnuaia attacking game an khelh tur hi mipui hmuh chak chu a ni.
Zidane hian Gareth Bale, Karim Benzema leh Cristiano Ronaldo-te chu an dam ṭhat phawt chuan a chhawr tur thu a sawi tawh a, BBC tia khawvel hriat larte hian Zidane-a hnuaia khel chhe bik nih an duh dawn lo. Deportivo tlarhnung tan anni pathum ngaihtuah ringawt pawh hi mut ti tui lo tham a ni ngei ang.
Football level sanga coa-ching tawnhriat la nei lo Zidane chuan, "He team nen hian nomawi chawi ka duh a, kan tum ber chu hnehna chan a ni tawp mai. Champions League leh La Liga nomawi kan la chawi thei a, a tawp thlengin kan theihna zawng zawng nen kan bei ang," tiin a lo sawi tawh a, Deportivo lakah hian an ti mai maiin a rinawm loh.
Team pahnih
Real Madrid hian Deportivo lakah league match kaw chhung chu a zawnin tlawm hmel an hmu tawh lo a, vawi riat chakin vawi khat an inhnehtawk a ni.
Deportivo hi Santiago Bernabeu-ah hian an tlangnel lo ve hrim hrim. Real khelmuala an zin chhuah hnu-hnung vawi 30-ah hian vawi khat chiah an la chak ve a, zaninah thawnthu danglam thlentir an tum ang.
Real hian league table-ah pathumna dinhmun luah mekin an chung chiaha awm Barcelona chu match khata khel tam zawk nichungin point hnihin an phak lo a, hmahruaitu Atletico Madrid chu point liin an phak lo mek bawk.
Deportivo erawh pasarih-naah awm mekin Real nena an inthlauhna hi point sawm lai a ni.
Barcelona inlan dawn
Zanin dar 8:30-ah Barcelona pawh an inlan dawn a, Nou Camp-ah Granada an mikhual ang. Barca hian league match 17 an khelh tawh aṭangin point 39 an hmu mek a, an chung chiaha awm Atletico Madrid chu khelh khata khel tlem zawk nichungin point hnihin an phak lo mek.
Barcelona hian Granada hi an ngam hle a, league match-a an intawn hnuhnung vawi 12-ah Barca hi chak zawkah ṭang vekin Granada hi vawi khat an chak ve thung.
Tun hnaia inkhel an hma-chhawn hnuhnung pangaah Barcelona-in tlawm hmel an hmu lo a, vawi li chak zawk-ah
ṭangin vawi khat an khingpuite an inhnehtawk pui thung. Granada hian inkhel an hma-chhawn hnuhnung pangaah vawi hnih chiah chak hmel an hmu thung a, vawi thum a tlawm zawkah an ṭang.
Pathianni zan dar 1:00-ah La Liga hmahruaitu Atletico Madrid an inlan dawn bawk a, Diego Simeone-a enkawlna hnuaia khel Atletico hian khualmualah Celta Vigo an lenchilh dawn.