Season tawp thlenga Swansea manager tur Curtis

Swansea City chuan an manager lailawk Alan Curtis chuan season tawp thleng an club a enkawl tur thu an sawi. Kum 61-a upa manager hian December 9-a Swansea-in an manager Garry Monk an ban hnuah Welsh club hi a enkawl ṭan a ni.

Player a nih laia Swansea tana lo khel tawh Curtis hian Welsh club hi a enkawl chinah match nga kaihruai tawhin vawi khat hnehna a chanpui a, vawi hnih a tlawm zawkah ṭangin vawi hnih tho an khingpuite an inhnehtawkpui.

Swans chairman Huw Jenkins chuan season tawp thleng atana Curtis an ruat chhan sawiin, "Team a kaihhruai danah hian kan lawm vek a, tun hnaia kan team khelh danah hmasawnna hmuh tur tam tak a awm a ni," a ti.

Garry Monk ban a nih hnuah Swansea hi David Moyes, Marcelo Bielsa, Roberto di Matteo, Gus Poyet, Brendan Rodgers leh Ryan Giggs-te nen sawizawm a ni a, heng zingah hian Argentina leh Chile manager hlui Marcelo Bielsa hming a ri ring ber.