December 13-ah Ranji Trophy khelh beisei

Board of Control for Cricket in India (BCCI) chuan ramchhung cricket chu November 19, 2020 aṭanga March 10, 2021 chhunga khelh zawh hman an tum. 

Covid-19 vanga ruahmanna siam danglam a ngaih tak avangin BCCI-in Syed Mushtaq Ali Trophy leh Ranji Trophy chauh buatsaih a tum a, 50 overs inelna Vijay Hazare Trophy leh Challengers Series te a buatsaih dawn lo.

Syed Mushtaq Ali Trophy hi November 19 leh December 7 inkarah khelh theih an inbeisei a, Ranji Trophy hi December 13 leh March 10 chhunga khelh theih an inbeisei. Ranji Trophy league stage-ah hian team hrang hrang chu group pangaah ṭhenhran an ni ang a, group paliah hian team pariat zel awmin NorthEast team paruk chu group khatah an dah khawm ang.

BCCI hnuaiah Mizoram pawh an inziahluh tak avangin 2018-19 season aṭangin first class cricket an khel ṭan. Ranji Trophy-a an tel hmasak berah Arunachal Pradesh nen an inhnehtawk a, match sarih dang an khelhah chak lo vekin team pakua awmnaah a mawngphahah an awm. Season liam ta khan Mizoram hi Plate Group-ah bawk awmin team 10 an awm tawh thung a, Sikkim an hneh bakah Arunchal Pradesh leh Nagaland nen inhnehtawkin pariatnaah an awm a, hmasawnna hmuh tur a awm.