FA Cup Champion lai Arsenal hmaah Sunderland
Zanin hian khawvela foot-ball knockout tournament upa ber FA Cup third round khelh a ni dawn a, champion lai Arsenal chuan Emirates Stadium-ah Sunderland an lo mikhual ang.
Gunners hian tun hnai kum hnih chhung chu a zawnin FA Cup nomawi an chawi tawh a, a zawna vawi thum champion thei pahnih Wanderers leh Blackburn Rovers te record tluk turin tun season-a champion chiah an mamawh tawh.
FA Cup hi kum 1871-72
aṭanga neih ṭan tawh niin vawi 12 champion tawh Arsenal chu champion hnem ber an ni a, an hnuai chiahah hian vawi 11 champion tawh Manchester United an awm thung.
Tun season atan 2015 August aṭang khan Qualifying round khelh ṭan niin December 5 khan second round khelh zawh a ni.
FA Cup first round leh second round-ah hian League One leh League Two club te an inel a, third round aṭangin Championship club te bakah Premier League club te an inlan ṭan ṭhin.
Hliam ngah Arsenal
Arsenal manager Arsene Wen-ger chuan Sunderland nen an inkhelh turah a player pawimawh Alexis Sanchez chu inkhel tura a la inpeih loh thu a sawi.
Chile international Sanchez hian November thla a Norwich City nen an inhmachhawn
ṭuma a malpui a tih nat avangin Gunners tan a la inlan leh lo. Midfielder Santi Cazorla leh Francis Coquelin te pawh khup na vangin an la inlan theih a beisei awm loh a, hetih mek lai hian Mikel Arteta leh Tomas Rosicky erawh inkhel thei tura beisei an ni thung.
Premier League hmahruaitu Arsenal manager Wenger chuan, "Tun thla chhungin Liverpool, Stoke City leh Chelsea kan la hmachhawn dawn avangin player fit tawk lo chunga chhawr ka tum lo. Sunderland lakah hian kan inkhelh hnuhung bera Newcastle hnehtu player te kha ka siksawi vak lo ang," a ti.
Insiamṭhat tum City
Zanin dar 8:30 tho hian Manchester City chu Norwich City khel turin an zin chhuak dawn a, manager Manuel Pellegrini tan tlawm a thiang lo ang. Nilaini khan Man City hian Everton chu 2-1 in League Cup semifinal first leg-ah an hneh lo a, final lut tur chuan an hna a hautak tawh dawn.
Man City tan Norwich hi an khauh lutuk lo tura ngaih a ni a, tun hnai an in tawn hnuhnung vawi 11-ah City hian vawi riat ngawt hnehna an chang thei.
Chawn na vanga inkhel thei lo striker Wilfried Bony chu a hmel kan hmuh theih tawh a rinawm a, Sergio Aguero, David Silva leh Kevin de Bruyne te an hahchawl a nih pawhin a mak hran lo ang.
United hna a awlsam?
Manchester United tan League One club Sheffield Uni-ted lo mikhual hi a huphurh-awm hran lo tura ngaih a ni.
Tun hnai kum 26 chhung-in United leh Shefield te hi FA Cup-ah vawi li an inhma-chhawn tawh a, United hi vawi thum chakin vawi khat an tlawm thung. Team pahnihte intawn hnuhnung ber chu 2006-07 Premier League kha niin Michael Carrick leh Wayne Rooney te goal khung hmangin United hi 2-0 in an chak.
Man United hian an mid-fielder Adnan Januzaj chu Bun-desliga club Borussia Dortmund aṭangin an ko kir leh tawh a, ani hi chhawr theih tur ni mah se inkhel bul ṭantu zingah a tel nghal a rinawm hran lo.
Hazard tel lo Chelsea
Zanin dar 7:30-a Premier League champion lai Chelsea tum tur hi League One club Scunthorpe United an nih avangin kum dang ang chu nise Blues hian FA Cup fourth round an lut chiang tura ngaih a ni. Amaherawhchu, tun season-a an chet dan ngaihtuahin Chelsea hi chak chiangsa a dah ngawt theih an ni lo.
League-a 14-na dinhmun luahtu Chelsea hian season hmasa Professional Footballers' Association Players' Player of the Year chawimawina dawngtu Eden Hazard tel loin an khelh a ngai dawn a, Belgian international hian kar hmasa a Crystal Palace 3-0 a an hneh
ṭumin a ṭhâl a ti na a ni.
Spurs Vs Leicester
Beisei phak baka season hmang ṭha Leicester City chuan Pathianni zan dar 9:30 hian Tottenham khel turin White Hart Lane an pan dawn a, an thiam-puipa Jamie Vardy erawh ṭhâl na vangin an hruai thei dawn lo.
Leicester hian tun season Premier League match 20 khelh tawh aṭanga point 40 hmuin table-ah pahnihna dinhmun an luah mek a, hmahruaitu Arsenal chu point hnih chiahin an phak lo mek. Mahse, zanina an hmachhawn tur Spurs hi an match hnuhnung 14-ah vawi khat chiah an tlawm avangin inkhel hautak a ni dawn a, dinhmun ṭha zawk sawi tur an awm lo.