Bayern defender-in Sunderland a zawm

Premier League table mawngphah lama talbuai mek Sunderland chuan Bayern Munich central defender Jan Kirchhoff an la lut a, German defender tana an sum sen zat erawh tarlan a ni lo.

Kum 25-a upa de-fender hian Stadium of Light-ah hian thla 18 chhung cham turin contract a ziak. Germany U21 international hlui hian Mainz-a aṭanga a football zinkawng ṭanin kum 2013 khan free-transfer in Bayern Munich a zawm a, Allianz Arena lamah hian hmun lailum a chan theih loh avangin Schalke lamah season hnih liamta kha chu loan-in a hun a hmang a ni.

Blacks Cats manager Sam Allardyce chuan, "Jan hi khawi hmunah pawh khel thei player a ni a, duh chuan centre-back leh midfield-ah kan chhawr kawp thei dawn a ni. Premier League-a inlan thuai thuai a chak tawh hle a ni," tiin a player thar chungchang a sawi.