FIFA buaina Platini-a'n FIFA president a chuh dawn lo

Kum riat chhung football kaihhnawiha inhnamhnawih thei lo tura hrem UEFA president Michel Platini chuan February-a FIFA president thlanna neih a nih hunah a chuh loh tur thu a tichiang.

Platini hi FIFA president kalchhuak tur Sepp Blatter nen thamna sum pound maktaduai 1.3 in pea puh an nih avangin kum riat atan hrem an ni a, hrem an nihna hi ngaihtuah nawn turin khinglet mah se February 26-a inthlanna neih tur chu a tan a hma mah mah niin Platini chuan a sawi a ni.

Kum 60-a upa Platini chuan, "FIFA president chuh ka tumna aṭang hian ka inhnukdawk a ni. Inthlanna neih hun tur hi ka tan a ṭha tawk lo a, candidate dangte nen angkhata inbeihna hun ṭha ka nei ve tlat lo. FIFA president chuh tura beihna hun ṭha pek ka ni lo a, FIFA leh FIFA president chuh ka tumna chu ka mangṭha rih mai a ṭul a ni," a ti.

'Ka bei zel ang'

Kum 2007 aṭanga Europe khawmualpuia football thunei-tu sang ber UEFAa hotu ber lo ni tawh Platini chuan, "Khelmual chhungah aiin court lamah football chanchin sawiin ka hun ka hmang tam zawk a ni. Enge lo thleng zel dawn kan thlir ang. Dik lo takin ka chungah rorel a ni a, ka bei let dawn a ni," tiin hrem a nihna chu theihtawp chhuaha beihlet a tum thu a sawi.

Thamna sum inpea puh Platini leh Blatter te chuan sum an inpek hi 1998 leh 2002 inkara an hna inpek vang a nih thu leh dik lo taka sum hman engmah a awm loh thu an sawi a, FIFA ethics committee lam pawhin thamna sum ngei a ni tih tihchianna engmah a awm loh thu sawi mah se hrem an ni ta tho a ni.

Platini chuan, "Ka thil tih tawhah khan inchhirna tur engmah ka nei lo. A chhan chu ka thil tihah khan tihsual engmah ka neih loh vang a ni. Eng thil nge thleng hi hriatthiam tumin ka bei mek a ni," tiin a chunga thil thleng chu amah ngei pawhin a hriatthiam loh thu a sawi.

Kum 20 hnuah

Football khawvela thawm nei na ber pawl English Football Association chuan October thlaa Platini chhui chian a nih hnu khan FIFA president tura an thlawpna chu an hnuhdawh thu an lo sawi tawh a, Platini erawh a buai phah lo.

French legend chuan, "Ram 150 velin FIFA buaina chingfel thei turin min beisei a, ka chungah rinna an nghat a ni. Mahse, tunah erawh FIFA president ka ni dawn ta rih lo. A ṭul ta a nih leh kum bithliah zat a awm chuan loh avangin kum 20 hnuah ka lo kir leh lo ang tih tu nge sawi thei?," a ti.

Platini hi kum 60 a ni tawh a, kum 20 hnua a lo kir leh a nih chuan kum 80 a chuang tawh dawn tihna a ni.

Tu nge FIFA president tur?

Platini-a'n FIFA president dinhmun a chuh thei dawn tawh lo a, kum 1998 aṭanga president nihna lo chelh tawhtu Blatter thlak turin mi panga chiah an bang ta. February 26-a chiang tur FIFA president hriat chakin football khawvelin FIFA headquarters awmna Switzerland lam a hawi mek a, FIFA president ni thei tur an inrinsiak mek.

Sheikh Salman bin Ebra-him al-Khalifa: Kum 50-a upa Bahrain lam chhuak hi Asian Football Confederation-a president ni lai a ni.

Tokyo Sexwale: Kum 62-a upa South Africa minister hlui leh sumdawng hausa ni bawk hi mihang te tana a beihna avanga lungin hial lo tang tawh a ni a, mi hmingṭha a ni.

Prince Ali bin al-Hussein: Kum 40 leka upa Jordan Prince hian May thla khan FIFA president chuhin Blatter a lo hneh lo tawh a, FIFA-ah vice president dinhmun a lo chelh tawh bawk.

Gianni Infantino: Switzer-land lam chhuak Infantino hi kum 45 leka upa nichungin UEFA general secreatry a ni mek a, FIFA reform committee-ah member nilai mek a ni.

Jerome Champagne : May thlaa Blatter a khin tur thu a sawi hnuah a inhnukdawk a, kum 57-a upa French pa-chal hi FIFA assistant general secretary hlui football adminis-tration lama tawnhriat ngah tak a ni.

FIFA president hi FIFA hnuaia ram 209 aiawhten an thlang dawn a, secret ballot hmanga thlan tur a ni ang.

Tu nge Platini?

Football khawvela hming dai tawh ngai lo tur Platini hian a vanglaiin French club Nancy leh St Etienne bakah Italian club ropui Juventus tan a khel ṭhin a, Turin khaw club tana a khelh lai hian a hun tawn ropui ber tawngin European Footballer of the Year-ah ṭum thum thlan a ni.

France midfielder ṭhin Platini hian ram tan vawi 72 lai khelin kum 1984 khan a captain-na hnuaiah European Championship nomawi a chawi pui a, kum 1982 leh 1986 khan World Cup semifinal a luhpui bawk.

Kum 32-a upa a nihin in-khelh a chawlhsan a, kum 1998-1992 inkar khan France team a kaihruai bawk. Spanish club lian Real Madrid enkawl tura an sawmna a hnar hnuah France president Francois Mitterrand-a'n 1998 World Cup France-in an thlen tura inrawlh tura a sawmna chu pawmin rei lo teah French Football Federation vice-president atan ruat a ni.

Platini hi kum 2002 aṭang khan FIFA executive committee member a la ni char char a, kum 2007 khan UEFA president-ah thlan tlin niin hrem a nih thlengin he dinhmun hi a chelh a, FIFA vice-president dinhmun pawh a lo chelh tawh bawk.