Hammers-in Andy Carroll hralh an tum lo

West Ham manager Slaven Bilic chuan tun hnaia chhuak tur anga an sawi striker Andy Carroll chu hralh chhuah tumna an neih loh thu a sawi.

Carroll hian hliam vangin season ṭan tir lamah a hmel a lan thei lo a, mahse a hliam dam hnuah match hnih khel tawhin Southampton leh Liverpool lamah goal a khung leh tawh a ni.

Bilic chuan, "Carroll hralh hi kan duh lo. Dressing room lamah pawh a boruak a ṭha em em a, he hmuna awm hi nuam a ti a ni. Amah duhtu an awm a nih pawhin club chuan tumah Carroll hralh tumin kan be lo ang," a ti.

Kum 27-a upa a striker chungchang hi sawi chhunzawmin Bilic chuan, "Goal a khung apiangin chhuak tur anga sawi thuthang a awm zel a, heng thu lengvel kan tih tawp theih dan awmchhun chu Carroll hi khel chhe hle se tih hi a ni mai a, chu chu a thlen kan duh si lo," tiin a striker chu chhuah tir a tum loh hmel hle.

English striker Carroll hi Sunderland leh Newcastle nen sawizawm a ni mek a, kum 2013-a Hammers chanchina player manto ber ni tura Liverpool aṭanga pound maktaduai 15-a West Ham zawmtu hi coach ṭawngkam aṭang erawh chuan a chhuakin a rinawm loh.