Kum bul ṭan ṭha Federer

Roger Federer chuan 2016 ATP World Tour season chu Ningani khan a khel ṭan ve ta a, a match hmasa berah Tobias Kamke chu minute 55 chhungin 6-2, 6-1 in a hneh. Nimin tlai khan a match hnihna khelhin Grigor Dimitrov chu 6-4, 6-7, 6-4 in a hneh a, Brisbane International Tennis Tournament semifinal a inhlangkai.

Swiss thiampuipa Federer hian kum 1998 khan Lucas Arnold Ker hnehin ATP World Tour season bul a lo ṭan tawh a, hemi hnuah hian a hawi kir tawh lo. A zawnin kum 18 chhung kum tira a match hmasa berah hnehna a chang zel a ni.

Hmeichhe double-ah Indo-Swiss duo Sania Mirza leh Martina Hingis te chuan season duhawm tak an hman zawh hnuah kuminah pawh an chetṭha chhunzawm zel a, Andreja Klepac leh Alla Kudryavtseva te ṭang dun chu 6-3, 7-5 a hnehin Brisbane International Tennis Tournament final an lut.

Tun dinhmunah Mirza leh Hingis te hi hmeichhe double world number 1 an ni mek a, an match hnuhnung 25-ah a zawnin hnehna an chang tawh a ni.

India chhuanvawr Mirza chuan, "Season duhawm tak hmang zo hlim ni mah ila kum thar a nih tawh avangin inkhelh a awlsam lo hle. Kan tournament khelh hmasak berah final kan luh avangin kan lawm a, nomawi chawi zui ngei kan tum," tiin a sawi.