I League kan nghak chhuak ta Vawiin tlai dar 4:30-ah Mohun Bagan Vs Aizawl FC
Vawiin tlai dar 4:30 hian I League hmasa ber chu Vidyasagar Krirangan Stadium, Kolkata-ah khelh a ni dawn. Champion lai Mohun Bagan-in Mizoram aṭanga I League khel tura inpet tling hmasa ber Aizawl FC an hmachhawn ang, vawiin hi Mizoram football tan ni chhinchhiah tlak a ni.
Mizoram Premier League champion Aizawl FC tana I League match hmasa ber hi Ten Sports-ah live in a en theih dawn. Mumbai khawpuia hmunpui nei infiamna channel lian Ten Sports hian kum 2007-a I League ṭan a nih khan tv lama tihchhuah phalna hi kum 10 atan an lei a, tun kartir khan tihchhuah phalna contract chu kum khat atan an pawtsei leh bawk. India rama club football inelna sang bera Mizote chevel hi Ten Sports aṭangin a en theih dawn a ni.
Zanin dar 7:00 hian Mizo panga awmna Bengaluru leh Salgaocar te an inkhel dawn a, he inkhel tur bakah hian Pathianni tlai dar 4:30-a Mizo pathum awmna East Bengal leh Sporting Goa te inhmachhawn tur chu Ten Sports-ah pekchhuah a ni ang. Mizoram-in I League club a neih hmaa Mizo club ang maia sawi ṭhin Shillong Lajong leh Mumbai FC inkhel tur erawh pekchhuah a ni dawn lo.
Aizawl FC chu
I League-ah hian match khatah player 18 a ziah luh theih a, Aizawl FC-in Mohun Bagan hmachhawn turin player 19 an hruai. Zin lo zingah Mizoram Police tana All Police Meet-a kal MPL4 best player, best forward leh top scorer F. Lalrinpuia bakah MPL2 leh MPL3 top scorer Lalbiakhlua te chu hming langsar an ni.
MPL4 champion Aizawl FC hian I League khel turin player paruk an lak belh a, chung zinga panga Lalawmpuia, Emmanuel Chigozie, Ricky Lallawmawma, Lalchhawnkima leh Atsushi Yonezawa te chu Kolkata club ṭha hmachhawn turin an hruai nghal. Spanish coach Manuel Retamero hian Mohun Bagan hmachhawn turin foreigner pali a nei a, Mizo player ṭha a kawl a, champion lai barakhaih thei an ni.
Mipui hmuh châk
Mizo mipuiin I League an ngaihven a, a bik takin January 16-a Bengaluru FC nena Rajiv Gandhi Stadium-a an inhmachhawn tur chu mipui nghahhlelh a ni a, ticket man zat leh leina tur chiang thei vat se an ti hle.
Football ngainatu tak tak chuan Mohun Bagan leh Aizawl FC inkhel tur hi tv kaltlanga thlir an châk tawh thung. Retamero chuan, "Kolkata-ah engkim a kaltuang a, mah se zep tur a awm lo. Mizo mipuite an ngaihawm tak zet a, I League match hmasa berah hian min ṭawiawm thei se ka ti hle," tiin supporter an mamawh thu a sawi lang.
Spanish coach chuan sawi zelin, "Relegate tura min ringtu an tam a, ka ngaihdan erawh a dang thung. Aizawl FC hi I League aṭangin season khatnaah kan tla lo ang. Champion Mohun Bagan hi kan hlau lo a, MPL-a kan tih ṭhin angin kan khingpuite chungah zahna kan lantir ang a, chak tumin kan khel ang. Player-te bulah pawh nuam ti taka khel turin ka hrilh a, amaherawhchu inelna a ni tih erawh hre reng turin ka fuih tel bawk. Mizoram tan Aizawl FC-in theihtawp kan chhuah ang," tiin chak tuma an khelh tur thu a sawi.
Aizawl FC boss chuan player chung-chang sawi zuiin, "Emma leh Kima te hi defender ṭha tak an ni a, amaherawhchu hrechiang turin practice-na hun kan nei tam hman lo. Ka player thar dangte pawh an ṭha a, Mohun Bagan an hmachhawn ang em tih erawh ka sawi lawk thei lo," a ti. Spanish coach hian damloh vanga Aizawl-a practice hnuhnung ber chhim thei lo Japanese midfielder Yuta Kinowaki chu a dam ṭhat tawh thu a sawi tel bawk.
Mohun Bagan leh Aizawl FC inkhel tur hi ruahman lawk dan chuan Salt Lake Stadium-a khelh tur a tih ni mah se Vidyasagar Krirangan Stadium-ah an khelhna tur hi sawn a ni a, Mizo player-te'n Salt Lake hu hang an pumpelh phah bawk.
Champion lai Mohun Bagan an ṭha a, chutihrualin an ṭhat ber danin Aizawl FC an hmachhawn dawn lo. Champion
ṭuma player pawimawh Nigerian defender Bello Razaq-a'n East Bengal a zawm a, a aiawh tura an lak Brazilian defender Luciano Sabrosa-a'n practice a la zawm lo. Bagan player ṭha ber zinga chhal theih Haitian interantional player Sony Norde-a ram tana a inlan avangin Aizawl FC a hmachhawn dawn lo a, India striker zinga tunhnaia hming langsar ber nikuma Mohun Bagan champion puitu Jeje Lalpekhlua'n contract a la ziak lo bawk.
Bagan-in an player langsar ṭhenkhat chhawr thei dawn lo mah se player ṭha dang an la ngah. Aizawl FC hmachhawn turin Japanese midfielder Yusa Katsumi, Shillong Lajong aṭanga an lakluh Trinidadian forward ṭha Cornell Glen baka ram tana khel tawh Indian player an kawl nual. Player hming aṭanga thlirin Aizawl FC-in Mohun Bagan an la pha lo takzet a, MPL champion hi an chak a nih chuan 'upset' anga chhiar tur a ni ang.