Mohun Bagan zawm tur Jeje-a

I League, Indian Super League leh SAFF Cup champion team-a player pawimawh ni vek thei Jeje Lalpekhlua'n I League season thar atan contract la ziak lo mah se a club khelhna Mohun Bagan-ah bawk khelh leh a tum thu Vanglaini palai a hrilh.

India forward Jeje chuan, "Mohun Bagan-ah contract chu ka la ziak lo a, amaherawhchu 90% vel chuan a chiang tawh ang. Chawlh hmanga Mizoram lama ka awm mek avang chauhin contract ka la ziak lo, hei vang hian I League match hmasa bera Bagan-in Aizawl FC an hmachhawn hunah ka inlan thei lo ang. Player en mai chuan MPL champon lai aiin Mohun Bagan an ṭha zawk a, amaherawhchu football-ah chuan engpawh thleng thei a ni a, chak zawk tur a hriat loh," tiin a sawi.

SAFF Cup champion zawhah Jeje-a Mizoram-ah a rawn haw a, January 6 khan Hnahthial Zone FA kaihhruaina hnuaiah khawtlangin an khaw tlangval hi an chawimawi a. Chennaiyin forward hi a haw kawngah Bungtlang, Rawpui leh Thiltlang khuaah te an chawimawi bawk. Hnahthial tlangval hi January 16-a Mohun Bagan-in Salgaocar an mikhual hunah a tel hman beisei a ni.

I League season tharah hian Aizawl FC an awm tak avangin Mizo khel an awm nual a, Goan club pahnih Sporting Goa leh Salgaocar bakah Mumbai FC-ah te chiah Mizo an awm lo. I League club thar DSK Shivajians-in ISL-a NorthEast United defender Zohmingliana Ralte leh Chennayin left back Lalhmangaihsanga Ralte te an la lut a, East Bengal-in Lalrindika Ralte, S. Malsawmtluanga leh Robert Lalthlamuana te an kawl bawk. Midfielder ṭha Didika hi nghalrek zai a la dam chian loh avangin sea-son bul a ṭan thei lo a, captain Punjabi defender Gurwinder Singh a inhliam avangin East Bengal season ṭantirh hian vice captain Robert Lalthlamuana'n captain armband a hreng ang.

North East state aṭanga I League khel hmasa ber Shillong Lajong-ah Mizo midfielder beiseiawmte an awmkhawm a, ISL season hniha inlan thei Zodingliana Tochhawng bakah Joseph Lalfakzuala, Samuel Lalmuanpuia, Isaac Vanmalsawma, Lalrammuana leh Jacob Lalrawngbawla te an awm a. Armed Veng tlangval Adinga leh College Veng tlangval Faka te hi an khup hliam a la damchian loh avangin Pathiannia Mumbai FC an mikhual hunah an tel thei lo ang.

I League champion rinkai zinga mi Bengaluru-ah Mizo panga Lalthuammawia Ralte, Lalchhuanmawia

Beikhokhei Beingaichho, Daniel Lalhlimpuia leh Malsawm-zuala te an awm bawk. India Junior team captain Daniel-a hian inhliam vangin season bul a ṭan dawn lo a, ngai awh turin kar li tal a la mamawh ang.