Nadal-a'n Kuznetsov hnehin quarterfinal a paltlang

Rafael Nadal chuan kum 2014-a a title lo lak tawh la nawn leh turin hmalam a pan zel. Ningani zan khan Andrey Kuznetsov hnehin Qatar Open quarterfinal a paltlang a, inkhel dangah Novak Djokovic pawh in Leonardo Mayer hnehin semifinal a inhlangkai ve bawk.

Doha-a inkhelah world number 5 Nadal hian world number 79 Kuznetsov lakah hian darkar hnih leh minute riat chhungin 6-3, 5-7, 6-4 in hnehna a chang. Nadal hian hnehna chang turin break point vawi 10 a hmuh aṭanga vawi nga chu a chhawr ṭangkai thei a ni.

Spanish thiampuipa Nadal chuan, "Kuznetsov khan a khel
ṭha hle a, a ball vuak a nain lo dawn-sawn a hautak thei hle. Ka service duhthusamin a ṭha tawk lo a, hnehna ka chan pawh kha ka vanneih vang chauh a ni," tiin a sawi.

World number 1 Djo-kovic-a'n kuminah set a la hloh lo tluang zel a, mahse awl-sam takin a chak tawh bik lo. Argentine star Mayer lakah set hnihnaah a service a hloh. Amaherawhchu, seeded pakhatna Djokovic hian 6-3, 7-5 in hnehna a chang.

Serbian tlangval Djokovic chuan, "Mayer hi player ṭha tak a ni tih ka hre lawk a, chutiang chiah chuan a rawn khel chhuak leh thei bawk. Ka tan fiahna hautak tak a ni a, ka paltlang thei erawh ka lawm hle," a ti.

Nizan khan semifinal khelh niin Nadal hian Illya Marchenko a hmachhawn a, Djokovic hian Tomas Berdych a hmachhawn thung a, result erawh kan hre hman lo.