Mbappe-a'n training a zawm

Paris Saint-Germain tan chanchin lawmawm hriat tur a awm, an forward chhuanvawr Kylian Mbappe chuan training a zawm pangngai leh tawh - France rawlthar hi Champions League lamah pawh an chhawr thei hial mai thei.

July thla khan PSG leh Saint-Etienne ten French Cup final an khel a, Paris club hian hnehna changin nomawi chawi mah se ke rek hliam vangin Mbappe an chan a, an lawm a kim thei lo. Kum 21 mi Mbappe chawlh chen tur a chiang lo a, Italian club Atalanta nen Champions League quarterfinal an khelh hunah inlan thei lo tura ngaih a ni hman. Mahse, an beisei aia hmain training a zawm leh thei ta.

PSG manager Thomas Tuchel chuan, "Kan beisei leh rin phak bakin a dam chak, amah enkawltu doctor kan hmu leh ang a, chumi hnuah a dinhmun tur a chiang ang," tiin a player duhlai a dam chak thu a sawi.

Nilaini zana Atalanta an hmachhawn hunah inlan hman lo mah se, hnehna changa semifinal an lut a nih chuan season kal laia goal 30 khawng tawhtu hi an chhawr theih tawh ngei a rinawm.

PSG hian Ligue 1 nomawi an kawl lai an humhim a, French Cup leh League Cup an chawi leh tawh bawk - an nomawi palina tur leh a vawi khat nan Champions League champion an tum hle.