Werner hliah khuh player-te tan hun ṭha - Nagelsmann

Chelsea-in pound maktaduai 54 sengin RB Leipzig aṭangin Timo Werner an la chhuak a, German club manager Julian Nagelsmann chuan Werner thlakna tur a neih thu a sawi.

RB Leipzig hian August 13, Ningani zanah Atletico Madrid nen Champions League quarterfinal an khel dawn a, Werner-a'n Chelsea a zawm tawh avangin Nagelsmann-a'n a chhawr thei dawn lo. Kum 33 mi Nagelsmann chuan, "Timo hian goal 34 a khung a, assist vawi 13 a neih bawk avangin a thawh hlawk hle. Patrik Schick nen kan goal khung hmun thuma ṭhena hmun hnih an khung. Hemi a nih avang hian thlak theih loh a ni tihna erawh a ni lo. Kan squad-ah hian theihna tam tak awm a, Timo hliah khuh player-te tan hun ṭha a inhawng," tiin Timo Werner an chan avanga indawm kun a tum loh thu a sawi.

German manager chuan sawi chhunzawmin, "Emil Forsberg, Ademola Lookman leh Dani Olmo ten khelhna hun tam zawk an thei ang. Goal nawr chungchangah harsatna kan neih ka ring lo," tiin a sawi.

RB Leipzig hi kum 11 chauha upa a ni a, tun season hi Champions League vawi hnih an khelhna a ni chauh a ni. Nagelsmann-a hote hian quarterfinal-a Atletico Madrid an hneh thei chuan semifinal-a Atalanta leh Paris St-Germain inkhela chak zawk an hmachhawn ang.