Zidane a hnuaiah Real an chak nghal

Real Madrid-in an manager Rafael Benitez an ban hnuah a aiawh turin club legend Zinedine Zidane an la lut a, khelmual chhungah player ropui tak ni mah se coaching lamah tawnhriat a la ngah loh avangin football khawvelin French player ropui hi a ring tawk lo.

Inrinni zan khan Zidane-a'n fiahna hmasa ber a hmachhawn nghal a, an goal khung zat chu goal nga niin an lamah goal a lut miah lo. Real hian an mikhual Deportivo La Coruna chu 5-0 in an sawp a, Zidane-a'n rintlak a nihzia a pholang.

Real Madrid tan Benitez-a chhuah vanga rilru hnual nia an sawi Gareth Bale-a'n khawvela player manto ber a nih chhan a tarlang a, goal thum khungin hat-trick a siam. French striker Karim Benzema-a'n goal hnih a khung bawk a, Real tan league match-ah goal 100-a khung ta.

Real thar?

Zidane a hnuaia an match hmasa berah chiang takin Real an chak nghal a, fak hluai nan erawh a la hma lutuk mai thei. Zidnae-a'n a enkawl hmaa an match hnuhnung pakuaah Real hi vawi khat chiah an tlawm a, goal 36 an khung.

Benitez-a record kha a chhe hran lo a, Real Madrid coach a nih miau avangin record chhe tak ni lo chungin an ban mai zawk a ni.

Zidane fakawmna erawh a hmelah zam hmel hmuh tur a awm lo a, khawvel thlir rawn nichungin a naute hahdam takin a kaihruai thei. Kum 43-a upa manager hian defence lamah Danilo aiin attacking lam puih nuamti Dani Carvajal a luhtir a, a tisual lo. Bale-a goal hmasa ber kha Carvajal-a siamsak hi a ni a, attacking football a khelh tur thu sawitu Zidane hi a match khatnaah chuan a thusawiah a ding tih a hmuh theih.

Bale leh Zidane

Rafael Benitez khan a player zingah Gareth Bale hi a duhsak bik nia sawi a ni a, Spanish manager ban a nih rual khan Welsh player hi a rilru a hnual hle niin an sawi.

Mahse, Zidane-a'n Real manager a nih tirhin Bale chu a rintawk thu leh Benitez-a'n ṭha taka a enkawl ang thoa a enkawl ve tur thu a sawi a, ṭha taka enkawl tlak a nihzia Bale hian khelmual chhungah a pholang bawk.

Bale hian Inrinni zana a khelh dan anga a khel reng thei a nih chuan kum 2013-a pound maktaduai 85.3-a Real Madrid a pan theih nana tha thawhhlawk tak Zidane hian a player rinrawl ber zingah a nei zui zelin a rinawm.

Zidane-a hmabak

Real Madrid-in tlarhma an neih
ṭhat­zia hi sawi nawn ngai lo a ni a, an tlarhnung erawh an thiamna angin an khel chhuak ṭhin lo niin a lang.

Inrinni zana inkhelah pawh Depor­tivo hian Real defending chhiat zarah hmahruaina hun ṭha an nei a, Real tlarhnungte an in man lo hle.

Real hian Zidane-a sawi anga Cham­pions League nomawi leh league title chawi an tum takzet a nih chuan an tlar­hnung hi an ngaihthah a thiang lo ang.

Zidane-a thukhawchang

FIFA world player of the year ṭum thum lai ni thei Zidane chuan, "Chak result kan hlawh chhuak a nih chuan coach tan hlim mai loh chu tih theih dang a awm lo a, ka hlim a ni. Ka thinlung ti lawmtu ber chu khelmual chhunga inlan leh inlan lo ka player-te rilru puthmang kha a ni. 5-0 a chak hi Deportivo-te ang team ṭha lakah chuan thil awlsam a ni lo a, ka hnuaia kan match hmasa ber leh training dan zawng zawngah pawh ka hlim em em a ni," tiin a naute khelh danah a lawm hle.