Liverpool pan tum lo Gotze

Tun hnaia Liverpool nena sawizawm Bayern Munich midfielder Mario Gotze chuan Allianz Arena chhuahsan tumna a neih loh thu sawiin Liverpool nena sawizawm a ni chu thu belhchian dawl lo a nih thu a sawi.

Germany interna­tional hi kum 2013-a Bayern Munich a pan hma khan Borussia Dortmund-ah tuna Reds boss ni ta Jurgen Klopp-a hnuaiah ropui takin a lo khel tawh ṭhin a ni.

Kum 23-a upa Gotze chuan, "Thlasik transfer-ah Liverpool ka pan dawn lo tih hi ka sawi duh a ni. Klopp-a'n Anfield lama min sengluh a tum anga an sawi hi khawi aṭanga lo chhuak nge a nih ka hre lo. In duh chuan Klopp-a hnenah min duh leh duh loh zawt mai rawh u. Klopp hian Liverpool-a khel tura min duh a nih chuan min rawn dawr ang chu," tiin Reds manager nen indawrna an neih loh thu a sawi.

Gotze chuan season thar aṭanga an coach tur Carlo Ancelotti chungchang chu Germany tana a khelhpui Real Madrid-a Ancelotti enkawlna hnuaia lo khel tawh Toni Kroos a sawipui tawh thu sawiin, "Kroos nen Ancelotti chungchang hi kan sawi tawh a, Kroos pawhin Italian manager chungchang hi a ṭha lam bak sawi tur a hre lo. Jurgen Klopp, Joachim Low leh Pep Guardiola-te enkawlna hnuaia ka lo khel tawh a, an aia
ṭha an awm chuang lo. Ka duh ber chu Bayern innghahna player nih a ni a, ka mawhphurhnate hlen ngei ka duh a ni," tiin Allianz Arena chhuahsan a tum loh hmel hle.