FA Cup Champion lai Arsenal an chak nghal

Inrinni zan khan FA Cup third round khelh a ni a, champion lai Arsenal chuan si an phurh zet hnuah Sunderland chu 3-1 in an lehthal a, fourth round an inhlangkai.

Arsenal-in FA Cup kum zawnin an cham­pion a, knockout inelna upa berah hian vawi 12 champion tawhin champion tam ber an ni. Arsene Wenger enkawl­na hnuaiah vawi ruk an champion tawh a, manager zingah French manager Wenger aia record nei ṭha an awm lo.

Premier League hma­hruaitu Arsenal manager Wenger-a'n FA Cup a ngainep lo a ni tih a player thlan dan aṭangin a lantir a; Petr Cech, Oxlade Chamberlain, Olivier Giroud, Theo Walcott, Laurent Koscielny leh Hector Bellerin ten inkhel bul an ṭan.

Inkhel chu

Emirates Stadium-a inkhelah Gunners defen­der Laurent Koscielny chet sual nangchingtu Sunderland forward Jeremain Lens chuan minute 17-na lekah goal hmahruai a khung.

Mahse, Arsenal-in champion zia an chhuah a, goal an chhuah vangin an buaiphah lo. Minute 25-naah Joel Campbell-a half volley mawi tak hmangin an siphurh an sut. Amaherawhchu, North London club hian goal dang an khung chhunzawm thei mai bik lo.

Second half minute 72-naah substitute Aaron Ramsey chuan an hmahruaina goal a khung a, Gunners hian an goal hnihna luh aṭanga minute thum hnu lekah striker Giroud hmangin an goal thumna an khung leh bawk.

Manager

thukhawchang

Arsenal manager Wen­ger chuan, "Goal kan chhuah hmasa phawt kha kan tan chuan fiahna a ni. Team ṭha chuan hun harsaah fiahna an paltlang ṭhin. Kan inkhelah khan kan puitling tawh tih a hriat a, kan khelh danah khan ka lawm khawp mai," a ti.

An goal hnuhnung pahnih siamsaktu Hector Bellerin chungchang sawi chhunzawmin, "Bellerin hi kum 20 chauha upa la ni mah se khelmual chhungah chuan a puitling tawh. Kan inkhel kha kan thlir chuan goal venhim leh goal khung tura nawr kawngah khan a thawh hlawk zia a lang chiang hle. Khawvela ṭha berte zinga mi a la ni thei ang," tiin a defender chu a fak hle.

Sunderland manager Sam Allardyce chuan, "Minute 70 thleng kha chuan kan intiat tawk viau a, mahse a tawpah erawh kan inthlau hle thung. Minute rei lote chhung kan inthlahdah zeuh kha kan tuar a, round sang zawk kan lut lo hi a pawi ka ti hle. Kan goal neihchhun khungtu Lens khelh dan khan min ti lawm a, kan team tan innghahna tham a la nih ngei a beiseiawm hle," tiin a sawi.

Arsenal hian Premier League-ah inkhel hautak an hmachhawn zui dawn a, Nilaini zan hian Liverpool an len chilh ang. January thla chhungin Gunners-in Stoke City leh Chelsea an hmachhawn zui bawk dawn a ni.