Elneny leh Arsenal an inhnimhnai

Arsenal manager Arsene Wenger chuan FC Basel midfielder Mohamed Elneny an lakluh hnaih tawh thu sawiin Egyptian midfielder chu January transfer-a an player lakluh awmchhun a nih mai theih thu a sawi.

Swiss Super League club FC Basel pawhin an player chuan club a chhuahsan ṭep tawh thu leh Arsenal zawm tura a inbuatsaih mek thu an lo sawi ve bawk.

Mahse, Wenger-a'n kum 23 leka upa nichunga Egypt tana vawi 39 inlan thei Elneny bak melh a tum tawh lo niin a lang. French manager chuan, "Tunah chuan kan player inhliam Tomas Rosicky, Danny Welbeck, Alexis Sanchez leh Jack Wilshere-te dam thuai theih dan tur ngaihtuah a ngai a, duhthlan tur Elneny kan neih belh theih ka beisei bawk," tiin player dang lakluh belh chungchang a sawi lang lo.

Kum 23-a upa Elneny hian Basel tan kum 2013 aṭang khan khel ṭanin match 95-ah goal nga a khung a, an ram Egypt tan match 39 khel tawhin goal thum a khung tawh bawk.