Police Meet-ah Mizoram Police an vanduai

Siliguri-a All India Police Meet khelh mekah Mizoram Police-in group stage-ah hneh loh tawng lo mah se goal difference-a Uttarakhand an tluk loh avangin an tla nghal.

Mizoram Police hi Uttarakhand, Bihar, Gujarat leh Manipur te nen group khatah an awm a. MPL4-a pariatna Mizoram Police hian an match hmasa berah Bihar chu Lalbiakhlua, Lalramtharmawia leh Lalsangbera te goal hmangin 3-0 in an hneh a, amaherawhchu match hnihnaah Uttarakhand nen 1-1 in an inhnehtawk a, an vanduai phah bawk.

Goal an mamawh tak avangin Mizoram Police-in Gujarat leh Manipur te 10-0 leh 6-3 in an hneh a, chak chiang viau mah se Uttarakhand-in Manipur (5-1), Gujarat (9-0) leh Bihar (5-1) a an hneh avangin goal difference hmangin Mizoram Police an vanduai ta a ni.

Police tan hian I Lea­gue club-a Aizawl FC tana inziak lut F. Lalrinpuia leh Lalbiakhlua ten goal nga ve ve an khung a, player ṭha pahnih hi Aizawl FC-in mamawh mah se closing ceremony-naa an tel a la ṭul tlat avangin January 16-a RG Stadium-a Bengaluru leh Aizawl FC inkhelh hunah an tel thei dawn lo.