Nadal hnehin Djokovic a champion

Novak Djokovic chuan kumina tour­nament a khelh hmasak berah hlawhtlina a chang nghal a, Inrinni zan khan Rafael Nadal hnehin Qatar Open champion a ni.

Doha-a inkhelah world number 1 Djoko­vic a khel ṭha hle a, minute 73 chhungin world number 5 Nadal lakah hian 6-1, 6-2 in hnehna a chang.

Grand Slam vawi 14 champion tawh Nadal hian tun hnaiah Grand Slam vawi 10 champion tawh Djokovic hi a ngam lo hle. An intawn hnuhnung vawi 11-ah Djokovic hian vawi 10 hnehna a chang.

Qatar Open final-ah pawh hian set khatna leh set hnihnaah Djokovic hian Nadal service vawi hnih ve ve a chhuhsak a, final zanah harsatna a nei lo

Player ropui pahnihte hi vawi 47 inhma­chhawn tawhin an intluk tawk hle a, kum 28-a upa Djokovic hian match khatin hnehna a chang tam zawk ta chiah a, match 24-ah hnehna a chang.

January 18 hian kumina Grand Slam hmasa ber Australian Open chu Melbourne-ah khelh ṭan a ni leh dawn a, champion lai Djokovic-a'n inrintawkna sang tak nen tournament a hmachhawn dawn tih a chiang.

Qatar Open-a champion chiah Djokovic hian ATP World Tour title 60 a la tling ta chiah a, Andre Agassi record a nih rual chiah a ni. Kum 1968 hnua lama professional player-te'n Grand Slam an khelh theih hnuah ATP World Tour title lak hnemah Djokovic hian mi pariat chiah a tluk lo. Serbian tennis player tluk lote chu Jimmy Connors (109), Ivan Lendl (94), Roger Federer (88), John McEnroe (77), Rafael Nadal (67), Pete Sampras (64), Bjorn Borg (64) leh Guillermo Vilas (62) te chiah an ni.

Djokovic chuan, "Inkhel bul ṭan aṭang khan ka duh leh beisei ang thlapin thil a kal emaw tih mai tur a ni a, ka ball vuak reng reng kha ka duhna hmunah deuh tak zel ka dah thei. Bul ka ṭan ṭhat miau avangin inrintawkna ka nei nasa a, kuminah Nadal lakah ka chet fuh hmasak avangin tournment lehpekah pawh ka tan inrintawkna neih a awlsam phah dawn," a ti.

Spanish star Nadal chuan, "Kei aiin a khel ṭha zawk a, champion phu zawk a champion avangin ka lawmpui. Player khel ṭha tluang lai dan tum hi a awlsam lo a, thil theih loh tluk hial a ni. Amaherawhchu, ka tan hun
ṭha a la inherchhuak ve ngeiin ka ring a, chu chu ka nghah chhuah a ṭul ang," tiin a sawi.