Barcelona chak nan Messi hat-trick

Lionel Messi-a'n footballer danglam bik a nihzia a pholang zel a, Inrinni zana Granada 4-0 a an hnehna inkhelah hat-trick siamin Barca-in match 20 chhung chu tlawm hmel an hmu ta lo.

Argentina captain hian inkhel ṭan aṭanga minute 15 chhungin goal hnih a khung a, second half-ah a goal thumna khungin Neymar chuan goal khat dang a khung ve bawk.

Barcelona tan an dan pang­ngaiin Messi, Luis Suarez leh Neymar-te an hmuhnawm a, South American player pathum hi khelmual chhungah an in man hle.

Inkhel chu

Inkhel ṭan aṭanga minute riat­na lekah Barcelona tan Messi-a'n goal a khung nghal a, Argentine player ropui goal khung tur hi Barca a zawm hnua a match hmasa ber khel Arda Turan siamsak a ni.

Minute ruk hnu lawkah Messi-a'n goal a khung lehnghal a, Neymar-a ball pek ṭha tak chu Suarez-a'n Messi thun turin awlsam takin a lo siamsak a, MSN che vel a hmuhnawm hle.

Second half-ah pawh Messi bawk a langsar a, minute 58-naah Neymar-a goal shot per let chu goal-ah chantirin league match riat a khelh aṭanga a goal 11-na chiah a ni.

Hun tawp nan minute sarih chiah a awm tawh tihin Neymar-a'n Barcelona goal lina a khung ve leh a, he goal luh theih nana Messi leh Suarez che vel hmuh hmaih theih a ni lo.

Enrique thukhawchang

Barcelona manager Luis Enrique chuan, "Ka naute khelh danah ka lawm a, inkhel ṭan tir aṭang khan match-ah chiah khan an rilru an pe a, ka naute hian point thum hlawhchhuah pawimawhzia an hrechiang hle a ni," tiin a player-te chu a fak.