Bournemouth striker thar Afobe

Premier League club Bour­nemouth-in January transfer-ah thawm an nei na zel a, beisei loh taka Roma winger Juan Iturbe an lakluh hnuah Wolves striker Benik Afobe la lut turin Championship club nen an inrem leh ta.

Bournemouth hian Afobe lakluh nan hian pound maktaduai 10 an thehchhuak dawn nia sawi a ni a, kum 22-a upa striker hian kum 2015-a Arsenal aṭanga Wolves a pan hnuah match 48 khelin goal 23 a khung tawh a ni.

Kum 2015 khan English football-a league match-ah Afobe aia goal khung hnem panga chiah an awm a, Watford striker Odion Ighalo (30), Tottenham striker Harry Kane (27), Fulham striker Ross McCormack (25), Cambridge striker Barry Corr (23) leh Burnley striker Andre Gray (23)-te an ni.

Cherries (Bournemouth sawina) manager Eddie Howe chuan kawng thui tak zawh tur an la neih thu a sawi a, hetih rual hian Afobe chuan team-ah phurna nasa tak a thlen theih a beisei thu leh goal tam tak an tan a la thun ngei a rin thu a sawi bawk.

Wolves chuan nipui transfer lai khan Afobe lakluh tuma dawrtu Norwich chu an lo hnar tawh a, mahse tun hnaiah player berin chhuah a duh bakah club neitu Steve Morgan-a'n club hralh a tum avangin Afobe chu an chhuahtir ta niin an sawi.