Serie A ngai lotu Giovinco

MLS club Toronto FC tana khel mek Italian striker Sebastian Giovinco chuan MLS chu nuam a tih thu leh Serie A lama kir leh chakna a neih loh thu a sawi.

Italy international hian nikum khan Ju­ventus aṭangin Toronto FC hi a zawm a, kum khata dollar maktaduai nga hlawh turin kum nga chhung atan contract a ziak. Canadian club tan hian season hmasa khan match 34 khelin goal 22 a khung a, Serie A lama kir leh tur anga sawi a ni.

Kum 28-a upa striker chuan, "Toronto-ah hian ka hlim em em a, MLS pan tura ka thutlukna avang khan ka lawm hle a ni. League khelh ṭan leh hun ka nghakhlel tawh hle," tiin a chet ṭhatna hmun MLS chu nuam a ti hle.

Italy tan vawi 23 a inlana goal khat khungtu chuan, "Juventus kha nuam ka tiin ka ngai em em a, mahse thutlukna ka lo siam tawh avang khan ka hlim a ni. MLS hi league ṭhang mek a ni a, nunphung danglam zawk hmachhawn zelte hi nuam ka ti a ni," a ti.

Giovinco chuan sawi chhunzawmin, "Serie A ngaihna ka nei lo a, tun dinhmunah chuan MLS hi nuam ka ti hle. Kan hmalam hun erawh tuman kan sawi chiang thei lo," tiin football-ah chuan engpawh thleng thei a nih thu a sawi.